İrəvani: bə Suriyə ələyh sionist rejimi həmləon, canqi cinoyətonin.

Zinə İ Bıə Milləton Təşkilatədə bıə İron İslam Respublika daimə nımoyəndə, Əmir Səeid İrəvani, bə Suriyə ələyh sionist rejimi həmləon məhkum iyən təsdiğış karde: ım həmləon canqi cinoyətonin.

Sionist rejim həmişə terroristonku himoyədorəti cəhəto, Suriyə kişvəri struktoron iyən mıvğiyyəti hədəf qətəşe.

Bə İrna raporti əsos, Suriyə barədə İ Bıə Milləton Təşkilati əmniyyəti şura iclosədə, Əmir Səeid İrəvani,de sionist rejimi vositə oxonə həmləon bə Suriyə mıvğiyəton əcumlə Avqustə manqi 31 minnə rujədə bə Hələb beynəlxalğə airport işorə iyən əlovəş karde: ım həmləon beynəlxalğə huğuğ iyən İ Bıə Milləton prinsipon oşko surətədə rioyət nıkardey.

İ Bıə Milləton Təşkilatədə İron İslam Respublika daimə nımoyəndə, təkidış karde ki ım həmləon Suriyə hakımiyət iyən ərazi təmamiyyəti rioyət nıkardey mənoe, Əv ijən İ Bıə Milləton Təşkilatiku tələbış kardə ki bə cinoyətoni ki beynəlxalğə əmniyyət və sulhi cinoyəton təhdid kardey holədəy, bəpe sionist rejimi cəvob doey məcbur ko.

Əmir Səeid İrəvani ijən Suriyədə bə xarıci hərbiçion ğəyre ğanuniyə iştirok işorə iyən təsdiğış karde: Suriyə baxşonku kali xarıci hərbiçion ğəyre ğanuniyə iştirok, terroristiyə fəaliyətonro çokə şəroyet icodış karde ki ım ko beynəlxalğə sulh iyən əmniyyəti təhdidəkəy.

İrəvani ıştə sıxənon dəvomədə, Suriyə milləti təbii mənbəon dızdiye məhkumış kardə, həmonə təbii mənbəon ki bə ım kişvəri iğtisodi komək kardeyro vey əhəmiyyətiışe xususi natə məhsulon ki xarıci hərbiçion işğal bıə məntəğəonədən. əv ijən məntəğədə Suriyə mıvğiyət iyən məntəğədə ım kişvəri 2tərəfiyə rabitəon çok kardeyku himoyətış kardə.

Veyə zəmone Suriyə şərğ iyən şimolədə və ğəyre ğanuni surət, Amerkə iyən çəy vabəstə bıə terroristiyə amilon iştirokışone, və əlovə bə ım kişvəri natə mənbəon iyən qandımi ğarət kardey, bə Suriyə hərbiçion və milləti ələyh həm hərəkətoni əncom dodən.

Im iclosədə, İ Bıə Milləton Təşkilatədə İron İslam Respublika daimə nımoyəndə həmçınin bə Suriyə ələyh ğərbi unilateralizmə sanksiyaon işorəş karde iyən votışe: bə Suriyə milləti ələyh unilateralizmə sanksiyaon dəvomi, çəvon jimoni muxtəlifə cəhəto bevəc iyən mısibətinə nəticəonış noə.

İrəvani ijən Suriyə insoni bədə şəroyeti barədə, beynəlxalğə qırdə bemoni diğğəton cəlbış karde iyən əlovəş karde: de diğğət bə ım şəroyet, bəpe insoni koməkon iminnə koon bıbu və siyasi şəroret, milləti insoni koməkonro mane məbu.

Miladi 2011 minnə soriku və terroristonku himoyə kardey cəhətədə, Amerkə iyən Avropa ittifoğ bə Suriyə muxtəlifə sanksiyaon ğərorışon do.

Miladi 2011 minnə soriku de Ərəbiston, Amerkə iyən çəy mıttəfiğon himoyədorəti, iyən bə sionist rejimi mənafe cəhəto məntəğə mıodiləon əvəz kardeyro, terroristiyə qrupon ıştə hevujə həmləon vositə, Suriyədə bıhran bino kardışone.