İron və Tacikiston miyono mədəni rabitəon hevujəti zərurət.

Təbrizədə Tacikistoni mədəni rujon mərosimədə, İroni şərği Azərbaycani ostandar, bə 2tərəfiyə mədəni rabitəon hevuj bey zərurəti təkidış karde.

Oktiyabrə manqi 3 tosə 8 minnə ruji Tehron, Təbriz və Şiraz şəhronədə, Tacikiston Respublika mədəni haftə, de İron və Tacikistoni mədəni vəzarətxonəon həmkoəti iyən İroni İslamiyə rabitəon və mədəniyəti Təşkilati həmkoəti bərpo bıdə.

Bə İrna raporti əsos, ım mərosimədə İroni şərği Azərbaycan ostandar Abedin Xorrəm, hınəku bənə həmmə milləton mıştərəkə zıvoni yodış kardə iyən əlovəş do: mədəni yiən hınə zıvon karde bəzne bəşəriyəti hevujətiro amil iyən zəminə icodəkə bıbu.

İroni şərği Azərbaycani Ostandar həmçınin bəyonış karde: bə İron və Tacikistoni miyono mədəni rabitəon hevujəti ehtiyocımone ijən təsdiğış karde: ım 2 qılə kişvəri kanə torix və sivilizasiya, veyə mıştərəkə xusiyəton nışoş do ki ım məsələ har qılə muxtəlifə baxşonədə rabitəon nığıl kardeyro istifodə bəbe.

İron iminnə kişvəronku bə hisob omeydə be ki Tacikistoni dıvləti istiğloli rəsmi zınəş be və iminnə kişvəre ki Dışəmbə şəhrədə ıştə səforətxonə ojıış karde.

Hiç qılə kişvər ni ki bənə İron İslam Respublika de Tacikiston nezə rabitəş bıbu, və çəy illət həm 2 qılə kişvəri milləton torixi, mədəni, dini, zıvoni və irği cəhəto nezə rabitəonin.

İron İslam Respublika xarıci siyasətədə həm Tacikiston barzə vırə soybe iyən İslamiyə İnğilobi Yolə Rəhbər həm ım 2 qılə kişvəri rabitəonku bənə "xışavəndəti rabitəon" yodış kardə.