Qeneral Tənqsiri: məntəğədə bə xarıci kişvəron iştirok ehtiyoc ni.

İslamiyə İnğilobi Sepah Təşkilati dıyo ğıvvə kamandir təkidış karde: məntəğədə bə xarıci kişvəron iştirok ehtiyoc ni və harcurnə deşmoni zərbə de mıtəğabilə zərbə dim bə dim bəbe.

Şəmsi 1360 minnə sori əvvələ soronədə, Sepah dıyo ğıvvə ıştə ko və fəaliyət binoş kardə, peşo Şəmsi 1364 minnə sorədə, bə Həzrəte İmom xomeyni(r)-i əmri əsos, ım ğıvvon bə Sepah dıyo ğıvvon nom noə bıə.

Hormozi tanqə tosə Fars dıyo oqətey, Sepah vey muhimmə məmuriyətonkue.

Fars dıyo 250 həzo kvadrat kilometr çəy hevujətie və ım həssosə məntəğəku mıhofizə kardey həm Sepah dıyo ğıvvə vey muhimmə məmuriyətonku bə hisob omeydə.

İslamiyə İnğilobi Sepah Təşkilati dıyo ğıvvə kamandir Qeneral Əlirıza Tənqsiri de Əlaləm xəbəiyə kanali votımonədə votışe: 32 qılə İron İslam Respublika kəştiku, ki dınyo həmmə vırəonədə iştirokışone, mıhofizə kəmon, həmçınin Ərəbi və Sıə dıyo, Sepah dıyo ğıvvon oxonə əmr bıə məmuriyətonku bə hisob omeydə ki kəştion skorti məmuriyət çəmə ohdəy.

Qeneral Tənqsiri ijən Sepah dıyo ğıvvə iştiroki coqrafiya və Sepah dıyo ğıvvə canqi zumandəti barədə əlovəş karde: Fars dıyo bə İron və Fars dıyo cənubi kişvəron məxsuse.

İslamiyə İnğilobi Sepah Təşkilati dıyo ğıvvə kamandir ijən votışe: İron İslam Respublika bə məntəğə kişvəron səmti bıvəti dasti dırozış kardə əmmo bəzi kişvəron səmtiku ım bıvəti şohyd ni.

Qeneral Tənqsiri təsdiğış karde: məntəğədə manıvroni ki Sepah dıyo ğıvvə bərpo kardəşe, dust iyən bıvə kişvəron səmtiku əcumlə Ğətər, İrağ, Omman iyən co kişvəronku dəvətış kardə və həmçınin muğabilədə, çəvon manıvrədə həm İron iştirokış kardə.

İslamiyə İnğilobi Sepah Təşkilati dıyo ğıvvə kamandir votışe: deşmon iyən dınyo istikbor ıştə hərbi əbzaron həvoteyro, bə deşmon pesoxtəti ehtiyocışe, əqə məntəğədə deşmon nıbu, məntəğədə deşmoni iştirok botile və hiç kəs çəvonku himoyət nibəkay.