Əmirəbdullahiyan: İron həmişə deşmonon xəbisə planonku de səbarzəti dəvardedə.

İroni xarıci vəzir de Tırkiyə xarıci vəziri telefoniyə votımonədə bə Şirazədə bıə terroristiyə həmlə işorəş karde iyən votışe: İron həmişə deşmonon xəbisə planonku de səbarzəti dəvardəşe.

Abanə manqi 4 minnə ruj, Oktiyabrə manqi 26 minnə ruji Çoşəmbə rujədə, qıləy silohinə şəxs bə Şahçiraği pokə hərəm varid bıə və bə zayiron səmti qullə ğandışe ki bə Farsi ostandari əmniyyəti-siyasi muavin, Muhebbipur elani əsos, ım terroristiyə hodisədə 13 nəfər şəhid iyən 30 nəfər həm zəxmin bıən.

DAEŞ terroristiyə qrup qıləy bəyoniyə ğolibədə ım hərəkəti məsuliyəti ğəbulış kardə.

Bə İrna raporti əsos, İroni xarıci vəzir, Huseyn Əmirəbdullahiyan de Tırkiyə xarıci vəziri telefoniyə votımonədə təsdiğış karde: dəvardə haftəonədə İslamiyə Respublika nizomi bəzi daşmonon cəhdışon kardə ta de oxonə hodisəonku sui-istifodə karde vositə, İronədə bestabiləti iyən noəmni icod və DAEŞ terroristiyə həmləro zəminəon hozzo kon.

Əmirəbdullahiyan ijən əlovəş karde: tosə bə ısət İron İslam Respublika çand kərə jıqo xəbisə planon şohid be iyən həmişə ım hodisəonku de səbarzəti dəvardəşe.

İroni xarıci vəzir həmçınin bə Tırkiyə məədənonku qıləyniədə bıə hodisə işorəş karde ki çəy dumoədə ım kişvəri şahrvandonku çand nəfər kıştə iyən zəxmin bıən, Əmirəbdullahiyan ım hodisə bə Tırkiyə dıvlət iyən millət təsliyət votışe iyən zəxmin bıə kəsonro şifo urzoş kardə.

Im telefoniyə votımonədə, Əmirəbdullahiyan Tırkiyə milli ruji həm təbrik votışe.

Tırkiyə xarıci vəzir, Mıvlod Çavoş Oğlo, Əmirəbdullahiyani təbrik voteyku təşəkkur iyən təsdiğış karde: İron İslam Respublika və Tırkiyə fəğət 2 qılə hamsuyə kişvər nin, bəlkəm 2 qılə bıvə kişvəronin ki həmişə çok iyən bevəcə rujonədə yande kənoədən.

Tırkiyə xarıci vəzir həmçınin Şirazi terroristiyə həmlə məhkumış karde iyən ım hodisə barədə co kərə Tırkiyə millət iyən dıvləti təsliyəti elanış karde və təkidış karde: həmişə de terrorizm mubarizə bardeyro,Tırkiyə İroni kənoədəy.

Mıvlod Çavoş Oğlo həmçınin co kərə İron və Azərbaycan Respublika miyono votımonon prossesiku himoyə iyən təsdiğış karde: har 2 qılə kişvər Tırkiyə dustonku hestin və ım 2 qılə kişvəron miyono dustiyətiku, Ankara vey xuşhale.