İron və Tacikistoni rabitəon bə inkişof rosniyero hələkə roon təğib kardey

Tehroni Əbbas abad turizm məcmuədə İron və Tacikistoni miyono 30 sorə oxonə rabitəon təğib kardey onemon bərpo bıə.

Bə İran Peres aqentiyəti raporti əsos, ım onemonədə İron və Tacikistoni oxonə 30 sor rabitəon iyən vəomeyədə 2 qılə kişvəri həmmə tərəfiyə rabitəon bə inkişof rəseyro hələkə roon barədə sıhbət bıə.

Im iclosədə, Eko iğtisodi və mədəni muəsisə rəsmi şəxson və Tacikistoni milli əmniyyət stratejikə təhğiğon mərkəzi yol iştirokışon be.

30 sor çımiku bənav, İron bənə iminnə kişvər Tacikistoni istiğlol rəsmi zıneydə və həmişə Tacikistoni millət iyən dıvləti kənoədə be. Həmçınin İron iminnə kişvər be ki Doşamdə şəhrədə ıştə səforətxonə ojış kardə.

İroni xarıci vəzarətxonə umumiyə diplomatiya mudir, Əlirıza Dılxoş votışe: İron və Tacikistoni mıştərəkə zıvon bois bıə ki həmişə 2 qılə kişvəri rabitəon bə inkişof rosniye cəhəto bıbu.

Hiç qılə kişvər ni ki bənə İron İslam Respublika bə Tacikiston nez iyən hamdıləti rabitəş bıbu və ım məsələ 2 qılə kişvəri milləton zıvon, din, mədəniyət, torixi iyən irğ cəhəto nezətion xotoe.

İron İslam Respublika xarıci siyasətədə həm Tacikiston vey barzə vırə soybe və İslamiyə İnğilobi Yolə Rəhbər həm 2 qılə kişvəri rabitəonku bənə Xışavəndi rabitəon yodış kardə.