İnsoniyə həxon barədə siyasi vindemoniku bə kəno mande lozime

İroni xarıci vəzarətxanə beynəl xalğ və huğuği məsələon muavin Seyd Əbbas İrağçi Fevrali 28 ədə Cenevrədə i bıə milləton təşkilati insonə həxon şura tojə iclosədə votışe: insonə həxon barde siyasi vindemoniku bə kəno mandə lozime.

İrağçi bə həmonə kişvəron ki insonə həxonku bənə əbzar və vəsilə ijən bə siyasi hədəfon rəsey xoto istifodə kardedən tənğidış kardə və təkidış karde ki: insonə həxon şura bəbe bo dınyoədə insonə həxon vəziyəti çok kardero erjinə sistem və prosesi əv həm de votımon və muzakirəon vasitə bino bıkən ne ın ki qıləy vırə bıbu ta bə kişvəron zidd ittihomon çəy dılədə əncom bıbu ya xot ixtilofon bino əkə amil bıbu.

İroni xarıci vəzarətxanə beynəl xalğ və huğuği məsələon muavin bə İroni islamiyə mədəniyyət və təmədduni kanəti və sabiğə işorəş kardə və votışe: İron həmişə kişvərədə insonə həxon peştədə mandə ijən vəziyəti çok karde pidəşe və həminə sahədə vey fəaliyəton əncomış due.

İrağçi votış: İron həmişə de i bıə milləton təşkilati insonə həxon şura həmkariş kardə və ım həmkarion jəqo dəvomış heste çən, İronədə bıə insoniyə həxon vəziyəti barədə çandə ğətnoməon təsdiğ karde kamilən be əsos və ğeyri ğabele ğəbule.

İroni xarıci vəziri muavin ijən bə Yəmənədə çandə insonə həxon ləğv bey işorəş kardə və votışe: umumi iştimaet bəpe jəqo fəğət bə Yəməni milləti əleyh bombardemon və cinoyəton barədə be diğğət nıbu ijən çın məzlumə milləti jenon və hırdənon ğətleami barədə sukut nıkə.

İrağçi Yəmənədə noxəş xonəon, məçiton və umumiyə vırəon ijən kəon bombardımon kardeyo bə bəşəriyəti əleyh canqiyə cinoyəton nımunə hisobış kardə və beynəl xalğ iştimaet iyən təşkilatonku pidəş be ım prosesi vəy qəte xoto ijən Yəmənədə vəhşiyə cinoyəton bə oxo rosniyəro ciddi və əməliyə koon əncom bıdən.

İroni xarıci vəziri muavin Fələstini işğal bıə sərzəmini barədə həm votışe: siyonizm rejimi cinoyəton ijən işğal əkə bərnoməon həm bəpe vey rə bə oxo bırəsi.