De İroni mərkəziyət təsirinə jenon beynəlxalğə icma təsis bəbe

Tehronədə təsirinə beynəlxalğə kanqeri iminnə dıvrə ixtisosi iclosədə de İroni mərkəziyəti təsirinə jenon beynəlxalğə icma təsis bəbe.

İ Bıə Milləton Təşkilati jenon məğom nomo bıə kamissiya siyasi hərəkəti bəpeşt ki de İroni nomi həminə kamissiyaku xarıc karde səpe, ısət Tehronədə qıləy muhimmə iclos de 90 qılə kişvəronku təsirinə jenon iştiroki dəvom kardedə.

Həminə kanqeri iminnə qırd bemonədə de İroni mərkəziyəti təsirinə jenon beynəlxalğə icma təsisi barədə təvafuğ bıə. Im təklifi İroni tərəfo bəyon bıə, de iştirokəkəyon rizoyəti bə ico be ki oxonə muğavilə sənədədə ğeyd və iştirokəkəyon tərəfo imzo bıə.

Tehroni iclosədə Erməniston, Burkinafaso, Ğırğizıston və Serbiya prezident iyən iminnə vəziron həyot həmroon Qinə bisao və Niqeriya eks prezidenton həyot həmroon, Niqeriya iminnə şahzadə məxsusə vığandə xanım, Serilanka iminnə şahzadə, Suriyə məxsusə nımoyəndə, Tırkəmənistoni jenon ibemoni şura yol və muxtəlifə co kişvəronku siyasi jenə şəxsiyəton iştirok və co bə co ıştə kişvərədə bıə təsirinə jenon və fəaliyəton barədə sıhbət kardışone.

İştirokəkəyon bə dınyoədə jenon həx-huğuği rioyət karde iyən milli və məzhəbi barzə jenon elan kardeyro bə kişvəron miyono həmkoəti təkid kardışone.

İroni prezidenti həyot həmro Xanım Ələmolhoda həm ım icma nomi Qohərşad vıjniyə təklifış do.

İronədə təsirinə jenon beynəlxalğə icmaədə 10 qılə sənəd jenon və ailə baxşədə hozzo bıə.

Ğeyd kardənine ki ım iclosədə 7 qılə məşhur və təsirinə jenon İron, Taylənd, Rusiyə, Arqentiya və Çiniku ğədrdonəti bıə. 700 qılə məşhur və təsirinə jen həminə iclosədə iştirok kardışone.