İslomiyə İnğilobi Yolə Rəhbər: tələbəon zəhrin kardey mevzu qıləy yolə cinoyəte

İslomiyə İnğilobi yolə Rəhbər, İronədə "tələbəon zəhrin kardey" mevzu qıləy yol iyən tov nıvardəninə cinoyət bəhisobış varde.

Bə Yolərəhbəri məlumatərosnə mərkəzi raporti əsos, İslomiyə İnğilobi Yolə Rəhbər Həzrəte Ayətullah Xamenei 3 qılə do toğə kaştey bəpeşt, kırtə sıhbəton çərçivədə bə "tələbəon zəhrin kardey" mevzu işorəş karde və ciddi surəti kəşfiyot iyən pilos təşkiloton ijən rəsmi şəxsonış bə ım məsələ təğib kardey təkidış karde iyən hamiyəşe: ım mıvzo qıləy yol iyən tov nıvardəninə cinoyəte və ehanə ım hodisədə amiloni iştirokışon bıbu, bəpe vey saxtə cəzo doə bıbun.

Həzrəte Ayətullah Xamenei ım hodisə çı ictima vey pok iyən beqınohə uzvon yəni hırdənon həxədə cinoyət və ictima pisixi noəmni ijən çı ailəon niqəronəti bois zınəş be və təsdiğış karde: həmmə kəson bəbe aqah bıbun ki ehanə şəxsoni bənə ım cinoyəti amilon zıney və məhkum bıbun, çəvon barədə hiç baxşışi ni boçi ki əvon bəpe bə vey saxtə cəzo bırəson ta co kəsonro ibrət bıbu.

İslomiyə İnğilobi Yolə Rəhbər həmçınin 3 qılə do toğə kaştey illəti barədə ki de do kaştey ruji ımsornə şuar yəni "har 3 qılə İroni 3 qılə do toğə" mıtobiğ be votışe: bə vıjniyə bıə şuari əsos, ehanə har İroni 3 qılə do toğə bıkaşto, 1402 tosə 4 sori mıddət, i milyard do toğə kaşteyro, dıvləti plan bə vırə bərəse.

Həzrəte Ayətullah Xamenei həmçınin ekoloqiya oqəteyədə bə do kaştey mıvzo əhəmiyyəti və 1 milyard do toğə kaştey kompaniyaədə bə milləti koməki işorə ijən əlovəş karde: koşınoson və mıtəxəssison tovsiyə kardən ki əlovə bə mivə doon kaştey bəpe vişə və dooni ki çəvon çu muhimme həm kaştey bıbun boçi ki kişvəri iğtisodədə çu ticorət veyə roli ifo kardedə.

Ə Həzrət ijən təsdiğış karde: bə i qılə məhsuli vabəstə mande iğtisodi nəticə, çəmə kişvəri ısətnə vəziyət bəbe ki milli pulli erj və inflasiya iyən bohoəti baxşonədə problemon bois bıə.

İslomiyə İnğilobi Yolə Rəhbər problemon həlliro de işorə bə rəsmi şəxson səy-cəhdon hamiyəşe: rəsmi şəxson bəpe iğtisodi həmmə imkoninə roonku istifodə bıkon ta milləti muşkilaton həlliro bə səhih iyən dırıstə hələkə roy dast peydo bıkon.