İnqilis və Avropa anti İron tojə sanksiyaon məhkumiyət

İroni xarıci vəzorətxonə sıxanəvot çı İnqilis və Avropa tojə anti İron sanksiyaon məhkumış kardə.

Bə İrib raporti əsos, Nasir Kənani bə Avropaədə bıə aşoftə şəroyeti ki çəy i qılə nımonə Fransədə muşahidə bıdə votışe: çı Avropa tojə ğərolon əsli illət ın ğitədə bıə sistematik anti bəşər həxon hərəkəton puşniye, iştimaii-iğtisodi behrononku umum fikon mınhərif karde iyən çəvon muğabilə koon çərçivədəy ki ın məsələ çı dınyo aqahə naziron çəşiku penhon ni.

İroni xarıci vəzorətxonə sıxanəvot əlovəş karde: Avropa bəzi tərəfon bəpe co kişvəron daxıli koonədə mudaxilə kardey əvəzi iyən ıştə milləti etosniye və əvoni təhğir kardey əvəzi bəştə mərdomi insoni iyən məsulanə diyə bıkon.

Kənani təkidış karde: İron bə milli ğudrəti təkyə karde sayədə və de zumandəti iyən tədbiri bə jığonə anti İron ıştənbəsə, ğeyri ğanuni iyən ğeyri mənteği koy reaksiya nışo bədoy və əy bənə ıştə həxı zınıydə.

Avropa i bemoni xarıci vəziron şura zinə və anti İron təhrimon çərçivədə İroni 1 qılə təşkilot və 8 nəfər şəxsiyətonış de bəşər həxon bəhonə bə sanqsiya siyohi əlovəş karde.