Bə 2qılə kişvəri parlamenti həmkoəti hevujəti, İron və Ozbəkistoni təkid

İron İslom Respublika parlamenti yol və Ozbəkistoni ğanun noey parlamenti yol bə 2 qılə kişvəri parlamenti həmkoəti hevujəti təkidışon kardə.

Bə fars aqentiyəti raporti əsos, Zinə Şənbə Tehronədə,  İron İslom Respublika parlamenti yol, Muhəmməd Bağır Ğalibaf de Ozbəkistoni ğanun noey parlamenti yol, Nuruddin Can İsmailevi mıştərəkə xəbəiyə iclosədə votışe: İroni İslomi parlamenti xarıci siyasəti iminnə koon, de hamsuyə və məntəğə kişvəron xususi islomi kişvəron rabitə bərğəror kardeye.

Ğalibaf ijən əlovəş kardə: iğtisodi, rabitəon inkişof, nəğliyot, və şimol-cənub mehvərədə tranzit baxşədə, İron və Ozbəkistoni miyono həmkoətiro vey çokə fırsəton mucude.

İron İslom Respublika parlamenti yol Əfğanıstonədə bə mucudə problemon işorəş kardə və votışe: de diğğət bə Əfğanıstoni mevzoon bəpe hamsuyə kişvəron miyono Əfğanıstoni koməkiro, ciddiyə həmkoətion əncom bıbu, əmə etığasımone ki Əfğanıstonədə milli devləti icod kardeyədə bəpe həmmə qrupon rolışon bıbu ta həmonə vırədə əmniyyət və hevujəti icod bıbu.

Im xəbəiyə iclosədə, Ozbəkistoni ğanun noey parlamenti yol, Nuruddin Can İsmailev həm işorəş kardə ki vəoməy manqədə, Ozbəkistoni prezident bə İron səfər bəkarde ijən əlovəş kardə: dəvardə soronədə İron və Ozbəkistoni rabitəon həmmə baxşonədə bə inkişof rəsəşe.