Əmirəbdullahiyan: 13minnə devləti xarıci siyosət, bə xarıci rabitəon hevujəti əsose

İroni xarıci vəzir Huseyn Əmirəbdullahiyan 13minnə devləti xarıci siyosət balanc və əktiv iyən bə xarıci rabitəon hevujəti əsos zınəşe və əlovəş kardə: de xarıci rabitəon hevujəti çərçivədə, çəmə xarıci siyosəti bərnoməonku vey baxşon bə de dınyo ticori və iğtisodi rabitəon stabiləti inkişofi əsose.

Bə İrna raporti əsos, zinə şəv və qıləy televeziya bərnomədə Huseyn Əmirəbdullahiyan Şanxay təşkilotədə İroni uzv bey əcumlə xarıci siyosət baxşədə 13minnə devləti muvəffəğiyətonku zınşe və votışe: vəoməy manqonədə şanxay təşkilotədə İroni uzv bey təsiron milləti surfədə muşahidə bəbe.

Əmirəbdullahiyan ijən bəyonış kardə: Şanxay təşkilotədə İroni uzv bey çəməro vey nəticə və muvəffəğiyətonış bəbe.

Əv ijən əlovəş kardə: iminnə məsələ ım ki ticori iyən iğtisodi baxşonədə əmə həmmə imkonaton ki Şanxay uzvonro hozzoe,soybimon, və 2minnə məsələ ım ki Şanxay fəğət qıləy təşkilot ki bə iğtisodi mevzuon əsos bıbu ni, və co qılə həmkoətion əcumlə əmniyyəti, mədəni, hərbi və de terrorizm və elm iyən texnoloqiya mubarizə brdey həm şomil bəbe.

Əmirəbdullahiyan ijən dollari sistemi barədə və qlobal iğtisodədə çəy zumandəti kam bey barədə votışe: ımruj fəğət İron ni ki məhəlli vəlutə istifodə kardeyku sıhbət kardedə, vey kişvəron iğtisod bə həminə unilateralizmə diyə xoto zərəl-ziyon vindəşe.

Əv ijən İron və Ərəbistoni sazışon barədə əlovəş kardə: Ərəbistoni mevzu barədə Səudi hakimon bə ım nəticə rəsəşone ki bəpe 2 qılə kişvəron miyono rabitəon bə hamsuyəti və mıtəğabilə ehtıroməti əsos icod bıbu, həm 2tərəf mənafe təmin kardedə bə həm məntəğəro mısbətə mesajış heste.

Əmirəbdullahiyan həmçınin İroni 3curnə cəzirəon barədə Fars dıyo həmkoəti şura iyən Rusiyə bəyoniyə barədə həm votışe: ərzi təmamiyyət, hakımiyət və istiğloli mevzu barədə de hiç qılə kişvəron sazışımon ni bə çəy xoto de ım vucud ki de Rusiyə çokə rabitəmon heste əmmo de ğoyməti Rusiyə səfiri vanq kardımone.