Kənani: bə Rusiyə İroni dıronon ixracat qıləy be əsosə iddioe

Bə Rusiyə dıron həvotey bəhonə, İroni xarıci vəzorətxonə sıxənəvot, bə İslomi Respublika ələyh tojə sanksiyaon əncom doeyədə Avropa ittifoği hərəkəti reaksiyaədə votışe: bə Rusiyə İroni dıronon ixracat be əsosə iddioe.

Çand manq çımiku bənaviku ğərb bə Amerkə rəhbəriyəti Ukrayna canqədə daveon əlovə bey həmzəman, bə İroni ələyh kali iddion bəyonış kardə be ki de ğoym surəti Tehroni tərəfo rəd bıə be.

Pencşəmbə rujədə həm Avropa ittifoği şura bə Ukrayna ələyh Rusiyə canqiku İroni himoyə be əsosə ittihomi tikror kardəş və bə İroni Avropa ittifoğiku dıron istehsol iyən soxteyədə bə ko qətə təchizaton ixracati ğədəğən kardəş.

Bə İrna raporti əsos, İroni xarıci vəzorətxonə sıxənəvot Nasır Kənani votışe: de Rusiyə İron İslom Respublika 2tərəfiyə həmkoətion və ım rabitəon bə Ukrayna canqi rəbt doey qıləy bə siyosiyə hədəfon hərəkəti əsose.

Kənani ijən de Ukrayna canqi barədə bə İroni İslomiyə Respublika ğoym iyən çand kərə muxalifəti işorəş kardə və diplomatiya royku vey rə bə çəy sə bey təkidış kardə.

İroni xarıci vəzorətxonə sıxənəvot ijən təsdiğış kardə: de təəsufin ğərb de siyosi motivasiyaon iyən pesoxtə bıə iddion bəyon kardey vositə, cəhdış heste ki bə İroni milləti ələyh məğlub bıə siyosəti bə ko bıqəto.

Kənani ijən təkidış kardə: İroni İslom Respublika ıştə həx zıneydə ki bə Avropa ittifoği sanksiya hərəkəton və çəvon uzvon ələyh çok iyən mıtəğabilə hərəkət əncom bıdə.