İslomi İnğilobi Yolə Rəhbər: ehanə muğavimət bıkon, ğullə fəth bəkardiyon

İslomi İnğilobi Yolə Rəhbər, bə Ərbəyine Huseyn(ə)-i mınosibəti xoto, universteti tələbəon əzodorəti mərosimədə təkidış kardə: ehanə muğavimət bıkon, ğullə fəth bəkardiyon.

Imruj sıb və de Ərbəyine Huseyn(ə)-i həmzəman, əzodorəti mərosim de veyə universiti tələbəon İslomi İnğilobi Yolə rəhbəri iştiroki bərpo bıə.

Im mərosimədə Həzrəte Əbaəbdullahel Huseyn(ə) və çəy bəfodorə əshabon həxədə mərsiyə handə bıə iyən Ərbəyini ziyorət həm ğeraət bıə.

Bə Rəhbəri təşkiloti məlumatərosnə mərkəzi raporti əsos, Həzrəte Ayətullah Xamenei ıştə sıxənonədə bə İmom Huseyn(ə)-i təvəssul iyən zodorə mərosimon de mənəviyəti nuri  rabitə və dəçokney iyən Huseyni şulə zəminə icodəkəy iyən roy nışo doey zınəşe və təkidış kardə: vey muhimmə mevzu ıme ki ım dəçokney oqətəmon iyən de sərostə roy rabitə bərğəror kəmon ki çəy lozimə ko irodə və muğaviməte.

Ə Həzrəte ijən təsdiğış kardə: ehanə muğavimət bıkon, bə Xıdo dini hakımiyəti ğullə və ədoləti və həxi hakımiyət bərəsən.

İslomi İnğilobi yolə Rəhbər ijən de təkid bə ım ki cıvonon umuəbaxşin, bə Nəcəf tosə Kərbəloku Ərbəyine Huseyn(ə)-i şemonədə milləti əzəmətinə iştirok xususi cıvonon iştirok, və həmçınin kişvəri co qılə şəhronədə işorəş kardə iyən bə cıvonon hamiyəşe: jəqo ki Ərbəyine Huseyn(ə)-i şemon royədə de ğoym hərəkət kardən, tovhidi hakımiyəti royədə həm ğoym və de irodə bə ico bıbin və həmişə Huseyni jimon bıkon və Huseyni bımandon.