İMT nımoyəndə:İron de qardı-ğubori mıborizədə lider kişfəre.

İbıə Milləton Təşkiloti Tehronədə bıə dayimi koordinatoru votəşe:Sanksiyəon İron İslom Respublikəş bə ətrof muhiti dast rəseyku məhrumış kardə.

Bə İroni Tələbəon Xəbə Agentəti(İSNA) məlumoti əsos,İbıə Milləton Təşkiloti Tehronədə bıə dayimi koordinator Stefan Prizner seşambə ruji de qardı-ğubori beynəlxalğə konfransi mətbuat konfransədə İronı de qardı-ğubori mıborizə mızokirəonədə navədə şıə kişfərış elon karde .

Prizner çe İbıə Milləton Təşkiloti bə qardı-ğibori zidd iclosi dəvordıneyədə ıştə dastəki ifodə kardə holədə,əlovəş karde:qardı-ğibori tufon ozavziyə iyən inkişof kardə holədə bıə qıləy qlobal probleme və qırd əv,hışki və həvo resurs və mənbəon dıjdə təsir nışon doə qıləy insonə məhsule.

İMT Tehronədə bıə nımoyəndə çe İron İslom Respublikə hukuməti de qardı-ğubori hodisə mıborizədə navəjənə roli malik bıeyış bəyon karde və voteşe: qardı-ğibori çe ixtisodiyyoti, di təsərrufoti, nəğliyyoti və inkişofı səlomətiyədə dıjd rol ifo kardedə və demi mıborizə bardey zəruriye.

İMT İronədə bıə dayimi koordinator çe İMT sər katib "Antonio Quterreş"i bə Tehroni konfransi mesaj vığandə holədə bə ın konfransi muhimmə roli təkid kardə holədə əlovəş karde:Sər katibi muavin iyən çe İbıə Milləton Təşkiloti Asiya Sakit Okeani sahədə Behroni İdorəkardey Agentəti direktor Xanım Letizia Rossano həm Tehroni konfransədə iştirok karde.

Qardı-ğubori tufon mıborizə sahədə beynəlxalğə konfrans çe həftə şanbə və işambə rujon Tehronədə bərpo bəbe.Bın beynəlxalğə sammitədə 50 məmləkətiku və 15 beynəlxalğə onemonon nımoyəndə iştirok və bın konfransədə ziyodə mığdorədə eksperton, universteti professoron,icroiyyə aparaton,elmi və təhsil mıəssisəon nımoyəndəon iştirok kardedən.