İroni Yolə Rəhbər: de dışmeni mubarizə barde meydonədə ciddimon.

İroni Yolə Rəhbər de Sistan iyən Bəluçıston ostani milləti vindemonədə təkidlş karde: de dışmoni mubarizə barde meydonədə ciddimon.

İroni Yolə Rəhbər lmruj de Sistan iyən Bəluçıston və Cənubi Xorasan ostanonku çand həzo cəmiyəti hərorətinə vindemoni cərəyonədə votışe: milli vəhdət iyən əmniyəti xərob karde çı dışmoni 2 qılə əsosinə ciddi hədəfonin, əmmo əmə həm dışmoni vədə de şiddəti ciddimon və xatir cəmimon ki əzizə İroni dışmonon de İroni milləti mığət iyən ciddi bey ijən rəsmi şəxson aqahəti hiç ğələti əncom doe əzınin.

Bə Rəhbəri Yolə məğomi təşkiloti məlumatərosnə mərkəzi raporti əsos, Həzrəte Ayətullah Xamanei ımrujnə dınyo təhəvuli astanədə iyən kali baxşonədə təhəvuli holədə zınəşe və istemori ğudrəton zəifəti və məntəğə iyən dınyo tojə ğudrəton icod bey ım yolə təhəvulaton 2 qılə xusiyət bəyonış kardə.

Ə Həzrət bə kali ğərbi mənbəon sıxənon əsos, Amerkə iğtidori funksiyaon əcumlə iğtisodi baxşədə məhv bey holədə zınəşe və hamiyəşe: devləton əvəz kardeyro Amerkə zumandəti iyən ğudrət məhv bey holədəy.

İslomi İnğilobi Yolə Rəhbər, Suriyədə məğlubiyəti və Əfğanıstaniku de zillətin surət fəror kardey, 2 qılə Amerkə ğudrəti məhv bey oşkoə nımunəonku zınəşe və hamiyəşe: co qılə mıstəkbiron həm bə jığo məhv bey dıço bıən, ijən ki ım rujonədə Afrika muxtəlifə kişvəronədə bə Fransə ələyh ki bənə kanə istemorqəre ğiyom bərpo bəbe və millət həm ım ğiyamonku himoyə kardedən.

Həzrəte Ayətullah Xamenei ijən hamiyəşe: Amerkə plan fəğət bə Iron məxsus ni, əv ijən təsdiğış kardə: ımruj məntəğədə Amerkə İrağ, Suriyə, Livan,Yəmən,Əfğanıston iyən hətto Fars dıyo kişvəronro ki çəy kanə dustonku hestin, bərnoməşon heste.

Ə Həzrət Amerkə plabi təbyin kardeyədə hamiyəşe: çəmə informasiya məlumaton nışo dodə ki Amerkə devlət, kişvəronədə əcumlə İronədə behron soxteyro qıləy məcmuə icodış kardə ki çəy məmuriyət noğtəoni ki karde bəzne behron icodəkə bıbun, peydo iyən təhrik kardeye. İslomi İnğilobi Yolə Rəhbər ikən əlovəş kardə: çəvon nəzəku tafoton, ğovmi, məzhəbi ixtilafon, cinsi məsələ iyən jen İronədə behron icodəkə noğtə və məsələonin ki pidəşone de ım məsələon təhrik kardey vositə bə çəmə əzizə İron zərbə varid bıkon.

Ə Həzrət ijən əlovəş kardə: be şək əvon karde nibəznen jığo koon əncom bıdən, çəy şərt ıme ki əmə həm mığət və huşin bıbəmon, bə xəto iyən səhvə roy səmti hərəkət məkəmon, həx iyən botili zıneyədə səhv məkəmon, deşmoni metodon bıznəmon, hiç qılə hərəkət, sıxən iyən koədə bə deşmon komək məkəmon və bə ğəflət iyən han dıço məbəmon. Həzrəte Ayətullah Xamenei milli əmniyyət, İroni co qılə bədxahon hədəfinə noğtə zınəşe və hamiyəşe: əvoni ki milli əmniyyəti təhdid kardedən, milləti deşmonin və zıney-zıney ya zıney-zıney nıbe deşmoniro ko kardedən.