Rəyisi bə məntəğə qeopolitik iyən marzon oqətey əhəmiyyət təkidış kardə

İron İslom Respublika prezdent də təkid bə məntəğə qeopolitik iyən marzon oqətey əhəmiyyət, votışe: bə harcurnə bəhonə, bə məntəğə xarıci kişvəron po oj bey bə hiç qılə məntəğə kişvəron mənafe ni.

Bə prezdenti məlumatərosnə mərkəzi raporti əsos, Tehronədə İron İslom Respublika prezdent, Seyd İbreym Rəyisi məxsusə koonədə Azərbaycan R. prezdenti dəstyar, Xələf, Xələfevi vindemonədə 2 qılə kişvəri rabitəon bə torixi iyən nığıləti dini bovəon iyən mədəni mıştərəkəçiyon əsos zınəşe və əlovəş kardə: İron və Azərbaycan R. muxtəlifə zərfiyəton soybin ki çəvon mıbodiləon 2 qılə kişvər iyən milləti mənafe təmin kardedə.

İroni İslomi Respublika prezdent, Tehron və Buko miyono rabitəon səthi inkişof doey iyən 2 qılə kişvəri rabitəonədə de ixtilof iyən dave icod kardey planon mubarizə bardey vey zəruri zınəşe iyən bəyonış kardə: məntəğədə stabiləti inkişof doey iyən oqəteyədə bəpe məntəğə kişvəron miyono həmkoəti iyən inteqrasiya bıbu, əv ijən əlovəş kardə: İron İslom Respublika bənə Erməniston iyən Azərbaycan R. zumandə hamsuyə komilə hozzoətiş heste ki ım 2 qılə kişvəri problemon iyən ixtilafon peqəteyro komək bıko.

Rəyisi də təkid bə məntəğə qeopolotiya iyən marzon oqətey əhəmiyyət, təsdiğış kardə: məntəğə votımonon yəni 3+3 votımonon ya co votımonon ki karde bızno Erməniston iyən Azərbaycan R. rabitəonədə problemon həl bıkon, İron ıştə himoyə elanış kardedə.

İron İslom Respublika prezdent ijən təkidış kardə: mənəğə kişvəron, məntəğə məsələon həlli zərfiyəti soybin və bə har curnə bəhonə, bə məntəğə xarıci kişvəron po oj bey bə hiç qılə məntəğə kişvəron mənafe ni.

Məxsusə koonədə Azərbaycan R. prezdenti dəstyar, Xələf, Xələfev həm ım vindemonədə Tehronədə ım kişvəri səforətxonəro icod bıə hodisə bəpeşt, 2 qılə kişvəri rabitəon oqəteyədə Rəyisi təsirinə rol iyən  İron İslom Respublika nəzəonku ğədrdonətiş kardə iyən votışe:
İron İslom Respublika iyən Azərbaycan R. məntəğə iyən 2tərəfiyə rabitəon nığıləti iyən zumandətiro yolə zərfiyəton soybin.

Xələfev İron İslom Respublika qıləy hamsuyə və məntəğə zumandə kişvər iyən ıştə kişvəri dust zınəşe və əlovəş kardə: Azərbaycan R. həm nığıl surəti etığadış heste ki məntəğə məsələon bəpe məntəğə kişvəron miyono de həmkoəti iyən votımon royku həl bıbu.