HƏMAS: israil bə bəşəriyəti ələyh cinoyət kardə holədəy

Ğəzzədə HƏMAS hərəkəti rəsmi şəxson, de sionist rejimi ləşkəri vositə, sakin bıə kəon çand kərə bombaon, bə bəşəriyəti ələyh cinoyət zınəşe və bə ım cinoyəton vey rə be hərəkət kardey təkidış kardə.

Oktiyabrə manqi 7minnə rujədə Fələstini muğaviməti qrupon sionist rejimi şərrə koon cəvobədə, işğol bıə sərzəminonədə həmmə curnə iyən mislış nıbıə əməliyoton bino kardışone ki işğolçiyon 75 sornə omrədə mislış nıbe.

Bə Ələrəbiyə kanali internetiyə mərkəzi raporti əsos, Ğəzzədə HƏMAS-i rəsmi şəxson komək və bəşərdustanə təşkilaton və beynəlxalğə ictimaro de təcili mesajon vığandey vositə sionist rejimi ləşkəri qınohon be hərəkət kardey və vey rə hərəkəton əncom doeyro, təkidış kardə.

Ğəzzədə devləti məlumatərosnə dəftəri rəyis, Səllamə Mərof votışe: de işğolçiyə ərtışi vositə dəvardə şəvi bombaonədə ki tosə sıb dəvomış be, çand da qılə sakin bıə kə, fabrika, məçit iyən dukon viron bıə.

Məerof ijən nota doşe ki Fələstin de qıləy nezə insoni faciə dim bə dime, boçi ki elektrik istansiya bə sutemoni sə bey xoto komil surət be hərəkət bəmando və bə həmonə məntəğə sakin bıə kəson, jimoni iminnə xıdməton ərosniye dəvomi ğeyri mumkin bəbe.

HƏMAS-i co qılə rəsmi şəxsonku qıləyni votışe: Seşəmbə şəviku tosə ısət, bə Ğəzzə tanqə sionist rejimi həvoiyə çand sa həmlə nəticədə, 30 nəfəriku vey kıştə iyən sa nəfər həm zəxmin bıən.