Sepah ayrokasmik ğıvvə komandir: de sioniston cinoyəton, Fələstini səbarzəti məhv nibəbe

Sepah ayrokasmik ğıvvə komandir de işorə bə ım ki Fələstini səbarzəti de sionist rejimi cinoyətkorə əməliyaton hiç vaxt məhv nibəbe,de Amerkə vositə İroni təhdidi barədə votışe: İron ğudrəti pikədəy və hiç kəs İroni təhdid kardey əzı ni.

Bə İrna raporti əsos, Dışəmbə sıbədə İslomi İnğilobi Sepah təşkiloti ayrokasmik ğıvvə komandir Qeneral Əmirəli Hocizodə Qeneral Şəhid Həsən Tehrani Muğəddəmi yolqətey mərosimi kənoədə ki Şəhid Rəcai universitədə bərpo bıə, votışe: Ğəzzə məsələ ımruj, bə qıləy beynəlxalğə mevzo əvəz bıə və dınyo millət sionist rejimi cinoyətkor bıey muşahidə kardedən.

Qeneral Hocizadə ijən votışe: Fələstini canqəkəyon səbarzəti qıləy yolə stratejikə səbarzətie. əv ijən təsdiğış kardə: ım səbarzəti de sionist rejimi cinoyətkorə əməliyaton və taktiki hərəkəton iyən hırdənon şəhid kardey hiç vaxt məhv nibəbe və əvon ğoym surət səbazin və vəoməyədə həmmə dınyo ım mevzo muşahidə bəkan.

İslomi İnğilobi Sepah təşkiloti ayrokasmik ğıvvə komandir bə Livan və Hizbullah canqi hevujəti İroni reaksiya barədə həm votışe: ımruj canq hevuj bıə və Livan həm canqi dəmandedə,ehtımolış heste ki daveon ımiku həm vey bıbu boçi ki vəoməy vey no məlume əmmo İron həmmə şəroyetiro hozzoe.