Əmirəbdullahiyan Fələstini sərnıvışti təyin kardeyədə bə ım milləti həxi təkidış kardə

İroni xarıci vəzir Huseyn Əmirəbdullahiyan təkidış kardə: Fələstini millət həxış heste ki ıştə sərnıvışti təyin bıko iyən Fələstini behroni komilə surəti hələkə roy, de Fələstini milləti həğiğiyə sakinon iştiroki referandomi bərpo kardeye.

Əmirəbdullahiyan ijən əlovəş kardə: Im fik və nəzə muxtəlifə baxşon, İMT-ədə de İron İslom Respublika vositə ğeyd bıə.

Bə İrna raporti əsos, İroni xarıci vəzir Huseyn Əmirəbdullahiyan de xarıci səfiron, rəyison və Tehronədə sakin bıə beynəlxalğə təşkilaton nımoyəndəon, xarıci vəzorətxonə vırədə qıləy iclos bərpo kardəşe ki ım iclosədə məntəğə oqətey və bə Ğəzzə ələyh sionist rejimi təcavuzi bə oxo rosniyero komək kardey, İron İslom Respublika hərəkəton, metodon və nəzəon bəyon bıə.

Əmirəbdullahiyan ım iclosədə de işğolçiyə deşmoni mubarizə bardeyədə, Fələstini ğanuniyə həxi çərçivədə Fələstini məzlumə milləti barədə muxtəlifə baxşonədə İron İslom Respublika konstraktivə cəhdon bəyonış kardə.

Əv ijən ıştə umu nışoş do ki bo otəşvəsi bə vırə rosniye de əncom bıə cəhdon nəticə doey vositə Ğəzzə be mudafiə hırdənon və jenon və şahrvandon zalımonə ğətli-am oqəte bıbu.

İroni xarıci vəzir ijən de təkid bə ım nuktə ki Ələğsa əməliyot komil surət de Fələstini vositə ğəror iyən icro bıə iyən votışe: sionist rejim de muğaviməti ğıvvon muğabilə kardeyro ıştə zəifəti jintonədə, Ğəzzə və ğərbi sahili be mudafiə millətiku intiğomış qətə ki çəy nəticə 14 həzoku vey Fələstini milləti ğətli-am iyən canqi cinoyət və etosniye be ki ım miğdoriku 70 fayiz hırdənon, jenon və piə odəmon bin.