İMT sərkatib: israil iyən HƏMAS-i saziş, səhihə royədə muhimmə qəme

İMT sərkatib Antoniyo Qutereş israil iyən HƏMAS-i miyono təvafuği səhihə royədə muhimmə qəm zınəşe və votışe ki İMT, HƏMAS iyən israili təvafuği icro beyku himoyə kardeyro ıştə həmmə cəhdon əncom bədoy.

Bə İrna raporti əsos, Çoşəmbə rujədə Qutereş votışe: az israil iyən HƏMAs-i təvafuğiku himoyə kardedəm, ım qəm səhihə royədə qıləy muhimmə qəme əmmo bəpr vey hərəkəton əncom bıbu.

Miyonə şərği sulhi prossesiro İMT məxsusə həmohənqəkə Tur Venslənd həm Ğəzzədə otəşvəsiku himoyəş kardə və votışe: daveonədə ım otəşvəsiku bəpe makzimum istifodə əncom bıbu və Ğəzzədə Fələstini zəruri ehtiyocon peqətey və qroqanon ozodi hoston kardeyro ım fırsətiku istifodə bıbu.

Əv ijən tələbış kardə ki humanitarə koməkon əncom bıbu və ım təvafuği hoston kardeyro Misr, Ğətər və Amerkə cəhdonku ğədrdonətiş kardə və əlovəş kardə: həmmə tərəfon bəpe ım muhimmə təvafuği oqəteyro ıştə məsuliyəti əncom bıdən, ım muhimmə qəme əmmo bəpe veyə hərəkəton əncom bıbu və az ım dard və əzobi bə oxo rosniyero bə həmmə cəhdom dəvom bədom.

Fələstini İslomi muğaviməti  hərəkət (HƏMAS)  iyən israili rejim 45 rujdaveon iyən canq kardey bəpeşt, de 4 rujə otəşvəsi təvafuğ kardışone. Bə ım təvafuği əsos, çand sa humanitar, tib və sutemoni koməkon boy maşinon bə Ğəzzə həmmə məntəğəon vığandə bəbe.

Ijən bə ım təvafuği əsos, 2 tərəfə hərbi həmmə hərəkəton oqəte bəben və 50 nəfər israili jen iyən hırdən ozod bəbe iyən çəy mığobilədə 150 nəfər Fələstini hırdən və jen ozod bəbe. ijən bə Ğəzzə səmt, işğolçiyə hərbi maşinon hərəkət iyən çəvon ğırəkə təyyarəon oqəte bəben iyən sionist rejim təəhudış kardə ki bə hiç kəs həmlə nıkon.