Sionist rejimi cinoyəton oqəteyədə, Rəyisi beynəlxalğə təşkilaton betəsir beyku tənğidış kardə

İroni prezdent, de Pakistoni prezdenti telefonə votımonədə sionist rejimi cinoyəton oqəteyədə, beynəlxalğə təşkilaton be təsir beyku tənğidış kardə.

Bə İran Peres aqentiyəti raporti əsos, İroni prezdent Seyd İbreym Rəyisi de Pakistoni prezdent, Aref Rəhman Ələvi telefonə votımonədə de işorə bə Ğəzzə məzlumə milləti ələyh sionist rejimi etosniye və cinoyəton dəvom və ım cinoyəton oqəteyədə beynəlxalğə təşkilaton be təsir bey, Ğəzzədə cinoyəton və ğətli-ami maşini oqəteyro bə ım rejimi təziğon əncom doeyro bə islomi kişvəron həmohənqə hərəkəti əhəmiyyəti dəvomi təkidış kardə.

Rəyisi ijən marzon əmniyyəti inkişofiro bə Pakistoni veyə cəhdon zərrurət təkidış kardə və həmkoətion hevujətiro xısusi enerji baxşonədə bə 2 qılə kişvəri veyə zərfiyəton işorəş kardə iyən ıştə umu nışoş do ki 2 qılə kişvəri rəsmi şəxson de veyə ciddiyət ım zərfiyətonku istifodə bıkon.

Im telefoniyə votımonədə ijən Pakistoni prezdent, Aref Rəhman Ələvi Fələstini məzlumə milləti həxiku mudafiə və himoyə kardey baxşədə bə İroni İslomi Respublika vırə işorəş kardə və  həminə mevzu barədə təsdiğış kardə: islomi kişvəron mıştərək və həmohənqə hərəkət və cəhd karde bəzne Ğəzzədə sionist rejimi cinoyəton oqətey cəhətədə bə ım rejimi veyə təziğon varid bıkon.