Moskvaədə İroni prezidenti bərnoməon.

İroni prezident və Rusiyə rəsmion, 2 tərəfiyə həmkarion, tojə rabitəon, sərmoyə noe ijən mıştərəkə proyekton barədə muzakirə bəkan.

İroni prezident Doktor Ruhani səfəri cərəyonədə Rusiyə dıvləti mətboat şobə elanış kardə ki ımruj və İroni prezidenti bə Rusiyə varid bey bəpeştə əv de Rusiyə i minə vəzir Demitri Medvedev mılağat bəkay ijən Avrasiya ticariyə təşkilati rejim və iğtisodiyə həmkarion barədə votımon bəkay.

Həmçınin ğərol bəy ki maştə ruji İroni prezident de Rusiyə prezident mılağat bıkə ijən ıştə 9 minə mılağati cərəyonədə məntəğə və beynəl xalğiyə mıvzoon bə kəno çandə həmkari sənədon de Vladimir Putin imzo bıbun.

İroni xarıci vəzarətxanə sıxanəvot Bəhram Ğasımi İroni prezidenti səfəri bə Rusiyə vey muhimmə səfər hisobış karde ijən bə Ruhani və Putini dəvardə 8 qılə səfəron işorə karde bəştə votışe: ım dıvrə səfəri cərəyonədə huğuği, məhkəmə, şəhr soxte, texnoloqiya və rabitə, enerji və varzış sahədə 10 qıləku vey həmkari sənədon imzo bəbe.

Çı Amerkə Vaşinqton Post nomo bıə rujnomə həm ım səfəri astanədə çı Tehron və Moskva miyono rabitəon barədə nıvıştəşe ki: ım səfər nışo doydə ki bo Rusiyə kişvəriro İron islam Respublika çandə əhəmmiyətış heste.

Ağaye Ruhani de Putini rəsmi dəvəti bərobər ımruj bə Rusiyə səfərış kardə.