Nəhcul-Bəlağə pand iyən hikməton

Nəhcul-Bəlağə pand iyən hikməton

Və ğalə Əli(ə)”rəyuş-şəyx əhəbbu iləyyə min cələdil ğulam-çe piyə merdi təbdor bəsə cıvoni şucoətisə bomı vey mahbube”.

Əmirəl-Muminin Həzrət Əli(ə) Nəhcul-Bəlağə həşto şəşminə hikmətədə piyə şəxson rayon iyən tədbiron de cıvonon şucoət iyən dılavərəti mığoyisə kardedə və hamyedə:”rəyuş-şəyx əhəbbu iləyyə min cələdil ğulam-çe piyə merdi tədbir bəsə cıvoni şucoətisə bomı vey mahbube”.

Har qıləy koyədə bə səbarzəti iyən bə mıvəffəğətiyon rəsey,qıləy səhihə royku bə şıkrəy ki,bo həmonə ko intixob bıbu və səhihə ro həm de qıləy dırıstə bərrəsi iyən fiki mıəyyən beydə.həlbəttə xəto nıbə holədə bərrəsi iyən fik çə kəson palu pəydu kardey bəbe ki,dırozə soronədə de hodisəon dimbədim omə və qıləy foydəninə təcrubəonış kəsb kardə.əvon py bıə şəxsonin ki,çe rujiqori sard və qamə rujonışon vində və de saxtə rujon dimbədim omeyədə mıxtəlifə roonışon bərrrəsi kardə iyən nəvən və çəvon həmməysə çokə qıləynişon vıjniyə.

Cıvonəti ğudrət,risk ğəbul kardeyenerji,nıtarsəti iyən əhvol-ruhiyyə,ehyanə çe dınyo vində iyən təcrubəninə şəxson elmi kəno ğərol nıqəto,mumkine betəsir iyən hətto təhlukənin bıbu.ğədimə alim iyən həkimon bın əğedədə bin ki,cıvoni qıləy tındəti iyən tijətiş heste ki,rəyrə koy əncom doydə.əmmo bənə tiy bəpe çe dayirəviyə kəmoni kəno ğərol bıqəto və çın qırdə kəmoni dılədə noey bıbu ta bə hədəfi bırəso.ehyanə həmonə kəmon dayirəvi və şat nıbu və de qıləy co iborəti əgər çəy həmonə peştış şat bıə iyən foydəninə təcrubəynə piyə şəxs nıbu,ım tiy çanədə həm tij həm bıbu,bə məğsədi nibərəse.bəçəy xoto Əmirəl-Muminin Həzrət Əli(ə) hamyedə:”çe piyə merdi tədbir bəsə cıvoni şucoətisə çımı nəzdədə bomı vey çoke”.zira sinnışon bəpe bıə merdon ki,çandə soron dırozi canqi meydonışon vində, təcrubəonışon omutə və bə həmonə təcrubəon əsos qıləy səhihə bərnomə plani kəşey zıneydən.qıləy holədə ki,deməkə ki,cıvonon bə qıləy zumandə cismi soybin,çe piyə şəxson ray iyən tədbırırşon ni.torıx həm Əmirəl-Muminin Həzrət Əli(ə) ln nuroni iyən həkimonə kəlomi təyid və təsdığ kardedə.məsələn Xəndəxi canqədə qıləy tədbir ki,Səlman Farsi çe xəndəxi kandey barədə fikış karde,Mədinə şəhrış çe dışmeni çənqali suğutiku hifzış karde,oqətışe.