Bə Suriyə ələyh Amerkə itərəfiyə sanksiyaonku İroni tənğid
İron İslom Respublikə İMT-də bıə səfir iyən dayimi nımoyəndə votəşe:AİŞ və çəy mıttəfiğon beəmonə sanksiyəon tətbiğ kardə holədə Suriyədə bə yavə humanitarə vəzyəti çəş vi kardey ğəror doəşone.
Bə Iran Press xəbə agentəti doə məlumoti əsos;İron İslom Respublikə İMT-də bıə səfir iyən dayimi nımoyəndə Əmir Səyid İrəvani İMT Əmniyyət Şurə de Ğərbi Asiya və Suriyədə bıə vəzyəti anqıl zinə (cımə şəvi) iclosədə bın kişfərədə bıə humanitarə vəzyəti yavəti barzə səviyyədə bıeyış işorə kardə və votəşe ki,Suriya milləti ijən həm dəhşətinə vəzyətədən və əvon ixtisodi problemon cəhəto vey nığılə əziyyət kəşeydən.
İrəvani əlovəş kardə:AİŞ və çəy mıttəfiğon de hərbi və ya diplomatikə kanalon bə dast vardey nızınə məğsədon rəseyro sanksiyəonku istifodə kardedən.
İron İslom Respublikə bə Suriyə zidd irtərəfinə sanksiyəon dərhol ləğvi tələb kardey və ın cur ğeyri-insoni tədbiron çe Suriyə xalği əsosə inson həxon darıştey təkid kardə İrəvani əlovəş kardə:bə İMT oxonə hisoboti əsos,16 milyon 700 həzo nəfər, yəni təxminən 70% Suriyə əhali bə təcili insoni iyən humanitarə koməqon niyozış heste.
İroni İMT-də bıə səfir iyən dayimi nımoyəndə votəşe:İron İslom Respublikə həğiğətən həm Suriyə rəhbərəti və de İMT koməqi bə həyot dəvordınə bıə siyosi prosesi dastək doə holədə, ijən bə Suriya millət iyən hukuməti boçəvon ərazi təmomiyyət iyən məmləkəti ibemoni bərpo kardeyədə bıə koməqi dəvom doydə.
İrəvani çı Suriyə ərazi təmomiyyəti bərpo kardero bə qırd terrorə qrupon ələyh muborizə bardero dəvominə səyonış tələb kardə və votəşe:İron İslom Respublikə bə Suriyə hukuməti anti-terrorə səyonədə tam iyən komilə dastək doydə və koməq kardedə.
İroni İMT-də bıə dayimi nımoyəndə bə Amerkə qırdn hərbi ğıvvon Suriyəku dərhol xaric kardey vocibəti təkid kardə holədə ğeydış kardə ki,ın ğıvvon ğeyri-ğanuni mevcudiyyəti dəvom, nəyinki,çı Suriyə suverenəti və ərazi darışteye,bəlkəm həm bın kişfərədə çe ğeyri-sabitəti iyən əmniyyəti nıbey əsosə mənbəye.
İron İslom Respublikə İMT-də bıə səfir iyən dayimi nımoyəndə oxoyədə votəşe:Reqiyonədə sulh iyən əmniyyəti bərğəror kardey yeqanə əməli ro,Əmniyyət Şura bəpe isyonkarə sehyonist rejimi bo Ğəzzədə canqi və tuməbıri dərhol oqəteyro məcbur kardeye.
