Sankt Peterburğ şəhəri metroədə terrorə faciə
Rusiya de İroni bahəm bə terrorçiə ğıvvon əleyh bardə mubarizə bə ım şərməndon muğaviməti səbəb bedə. Əvon bəştə mürtəce məğsədon rəse ro bə har curə terrorə vasiton dast ğandedən, dinc əhali ğətl kardedən.
Jıqo qıley terrorə hərəkət apreli 3-minə ruji saat 14-30 dəğiğədə Sankt Peterburğ şəhəri metroədə vağeə bıe. Poyiz "Sennaya ploşad" stansiyaku dəro qınyə bəpeştə çey 3 minə vağonədə qıley terrorçi ıştənış tıpne. Maşinisti bə poyizi hərəkəti dəvom doşe, və " Texnoloqiçeskiy institut" stansiyadə sərnişinon təxliyə kardışone. Im terrori nəticədə 14 nəfər həlok, 49 nəfər zəxmin bıən. Qıley bombən "Ploşad Vosstaniya" stansiyadə peydo, və vaxtədə bezərər kardəşone.
Rusiya İnformasiya Aqentiyyət "TASS" apreli 4-ədə xəbə doşe ki, Təhğiğat Komitə ım tıpemoni icra kardə odəmi nom oşko kardəşe. Əv Qırğızıstonıj, 1995 -minə sori təvəlludinə Cəlilov Əkbərcon bıə. Dıminə bombən çey tərəfo noe muəyyənşon kardə.
Sankt Peterburği meriya şəhərədə 3 rujnə matəm elan kardəşe.
Xarici devlətə rəhbəron ım terrorə hərəkət məhkum kardəşone. "Fontanka.ru" sayt xəbə dodə ki, şəhəri xarici konsulatə numayəndon həmonə "Texnoloqiçeskiy institut" stansiya vədə vıləçambə noəşone.
Rusiyadə "Tolışə diaspora" təşkilati sədr İsmail Şabanoviən de ım faciə əlağədar çe Rusiya tolışon nomo həmdardi izhar kardəşe, bə həlok bıəkəson əvlodon dılvandi doəşe.
