İroni İslomi İnğılobi Rəhbəri muavini de Rusiyə Sər Mufti bıə dido

Dec 05, 2024 06:29 Asia/Tehran

İroni İslomi İnğılobi Rəhbəri beynəlxalğə koonədə muavin iyən çe Rusiyə sər mufti de dini və mədəni həmkoəti inkişofi əloğədor mızokirəşon kardə iyən diyaloqışon dəvordınə.

Bə Səhab şəbəkə bə İRNA xəbə aqentəti istinodən doə məlumoti əsos,İslomi İnğılobi Rəhbəri Aparati beynəlxalğə məsələon sahədə muavin Ayətullah Muhsin Ğomi zinə (çoşənbə ruji) de Rusiyə Mısılmınon dini idorə rəyis iyən sər mufti Şeyx Ravil Eynuddin-i vindemon kardəşe və çəy bə Ğəzzə iyən Livani məzlumə milləti doə dastəqış və çı İslomi məzhəbon miyono vəhdəti icod kardeyədə çe mufti və Rusiyə mısılmonon dini idorə rəhbəri rolış barz qəte və çəyku ğədrdonəti kardə holədə voteşe:İnğılobi Rəhbər iyən çe İron İslom Respublikə prezdent bə dıtərəfinə munasibəton inkişof və nığıləti təkid kardedən və de Moskva ciddiyə cəhd və səyon ım rabitəon həmmə sahəondə rujbəruj hevuj beydə.

Bın didoədə Rusiya Mısılmınon Sər Mufti Şeyx Ravil Eynuddin həm de İnğılobi Yolə Rəhbəri dəftərxonə beynəlxalğə koonədə muavini vindemoniku ıştə məmnunəti ifodə kardə holədə,çe Ayətullah Seyd Əli Xameneyi və Vladimir Putini mudrikə rəhbərəti jiyədə çı Rusiyə iyən İroni bəştə dışmenon səbarz bey barədə xotırcəmətiş ibroz karde.

Rusiya Mısılmınon Sər Mufti həmçinin İron İslom Respublikə prezdent Məsud Pezeşkiyanış bo Moskva Came Məçitədə iştirok kardey və de Rusiyə mısılmınon dido kardero dəvət kardəşe.

Bın vindemonədə İron İslom Respublikə Rusiyadə bıə səfir Kazım Cəlali,Moskva İslomi Mərkəzi rəhbər iyən çe dıqlə kişfəri mədəni və dini nımoyəndə heyəton həm iştirok kardəşone.