Məntəğə və dınyo mediyaonədə İroni Yolə Rəhbəri bəyonat.

Çı İroni Yolə Rəhbəri zinə ruji muhimmə bəyonat dınyo və məntəğə mediyaonədə vey diğğəton bəştə tərəf cəlbış kardə.

Şin Hova aqentiyəti ğeydış kardə: Ayətullah Əli Xamenei çı məntəğə bohranon de votımon və muzakirə vasitə həl karde tələbış kardə mətləbi dəvomədə omə ki, əv bə ım nuktə işorəş kardə ki xarıci kişvəron əcumlə Ərəbiston bəbe Suriyə, Yəmən və Bəhreynədə mıdoxilə nıkən və ım kişvəron bəbe ıştə sərneveşti de siyasiyə votımoni mıəyyən bıkən.

Şin Hova aqenti çı İroni Yolə Rəhbəri nəğliku nıveştəş be: xarıciyə kişvəron bəbe bə canqədə qiriftor bıə kişvəronədə bıə terroriston ijən siloh doe və komək karde vədə mane bıbun.

Çini ım xəbəiyə  mərkəz dəvomış doe ki: Ayətullah Xamenei Bəhreynədə Ərəbistoni ğeyri mənteğiyə huzuri məhkumış kardə və əlovəşon kardə: Bəhreyni dıvlət bəbe de Bəhreyni millət votımonış bıbu.

Şin Hova aqentiyəti həmçınin ğeydış kardə: Ayətullah Xamenei çı Amerkə prezident Donald Trampi siyasətonku bə çəy xoto ki bə Səudi Ərəbistoni rəsmion himoyə kardedə tənğidış kardə.

İroni Yolə Rəhbəri zinə ruji bəyonat ijən İroni inğilabi bino əkə Həzrət İmom Xomeyni(r) bəfot karde 28 minə sorqardımoni mınosibətiku ə Həzrəti pokə hərəmədə nıtğon çı Azərbaycan Respublika Terend aqentiyəti, APTN televeziya kanal və kuveyti rujnoməonədə həm pıvılo bıə.