Zərif: terrorizm hiç qılə irğ-məzhəbon simvol ni.

İroni xarıci vəzir ıştə Tuvitter səhifədə terrorizmi barədə çı ğərbiyə kişvəron 2 dimə siyasətonku tənğidış kardə.

İroni xarıci vəzir Cəvad Zərif Amerkə Virciniya ıştatədə bıə irğçiyə hərəkəton iyən Barselon şəhrədə bıə terroristiyə əməliyatonku tənğidış kardə ijən ğərbədə har qılə terroristiyə hərəkəti bəpeştə jıqo bə İslam dini əleyh hucum karde məhkumış kardə və votışe: de harcurnə irğ və məzhəbi nom terrorizm, ijən terrorizme boçi ki terroriston çı dınyo məzhəb və irğon nımoyəndə və simvol nin.

Çəy bəpeştə ki dəvardə haftə Amerkə Virciniya ıştatədə irğçiyə rasizmə hərəkəton i nəfəri kıştə və 19 nəfəri zəxmin bey bois bıə Amerkə prezident Donald Tramp vey həvəsış nıbıə vəziyətədə əy məhkumış kardə əmmo  rə-rə Barselon terroristiyə hadisə bəpeştə qıləy tovhin və beehtıromtəti əke mesajədə(bəştə botilə fiki əsos) ım huccumi çı islamiyə terrorizmi nəticə ğeydış kardə.

Amerkə mediyaon etığadışone ki Tramp çı Amerkə radikaliston himoyəonku istifodə karde xoto jıqo irğçiyə hərəkəton məhkum nıkaredə.

Barselon şəhri terroristiyə hadisə nəticəku Daeş terroristonku qıləy uzv de maşini bə cəmaəti həmləş kardə ijən 100 nəfəri zəxmin karde kənoədə 13 nəfəri kışte.