Əfğanistanədə Amerkə həvoiyə hucumi məhkumiyyət.

Əfğanistanı nakonə president əfğanistanədə Amerkə həvoiyə hucumon və cinayəton iyən ğeyrehərbion kışteş məhkum karde.

Bə AVA aqentəti xəbon əsosi əfğanistanı nakonə president Hamed Kərzəy zinəıştə ıştə sıxanonədə bı nezonədə Amerkə bə əfğanistanı  Loqər ostani həvoiyə hucumonış bəşəriyə cinayət və beynəlxalğə ğanononku bə kənoş zınə və amerkəku tələbış karde təciliyə holətədə bə əfğanistanı ğeyre hərbiyə binaon zid  həvoiyə hucumon oxo bıdə.

Hamed Kərzəy Amerkə tojə stratejiş Əfğanistanı vədə ki bə ım məmləkət tojə hərbiyə ğıvvon vığande və hərbiyə ğıvvon ədədi ve kardeku iborəte qıləy məğlub bə stratejiş zınə və votışe:Amerkə hərbiyə huzuri ve be əfğanistanədə bə nooroməti ve be bois bedə.

Amerkə mudafiyə vəzorətxonə ıştə tojə sənədonədə əfğanistanədə bə Amerkə hərbion ədədış 11 həzo nəfər elanış kardə .

ğərore təğribən 4 həzo Amerkə hərbionku həm bə Əfğanistan vığandə bıbon.

Amerkə hərbiyə təyyarəon dəvardə 4 şanbə ruji əfğanistanı şərğ Loqər ostanədə Polələm şəhri ğeyre hərbiyə binaon bombardımon kardə ki nəticədə 30 nəfər mincumlə xəyli jen və hırdən kıştə və xəylion həm yarəjə bedən.