Ətomiyə təvafuği barədə ijən muzakirə karde imkanış ni.

İroni xarıci vəzir İroni ətomiyə təvafuği barədə ijən muzakirə karde ehtımalon rədış kardə.

Bə İrna raporti əsos İroni xarıci vəzir Muhəmməd Cəvad Zərif Niyoyorkədə de Asoşieted-peres aqentiyəti mısohibə cərəyonədə təkidış kardə: ım ki Trampi bəzi məsləhətçion iyən Amerkə dıvləti bəzi rəsmi şəxson İroni ətomiyə təvafuği barədə ijən muzakirə karde barədə ehtımalon bəyon kardedən qıləy be əsosə iddiaye boçi ki ətomiyə təvafuğədə harcurnə islahat və ya xot əvəz bey çandə problemon icod bəkay.

Əv İroni tojə rəkıtiyə imtivoni bəpeştə Amerkə prezidenti iddiyaon barədə həm votış: Donald Tramp vey çok əbi iddiaon və niqəranion elan karde bə nav həğiğəton təğib bıkə ijən sıxənon səhihku xatircəm bıbu.

İroni xarıci vəzir çı Trampi tojə miqrasiya ğanuni vey təəsufin zınəş be ijən əlovəş kardə: Tramp de siyasi be əsosə illəton qıləy milləti bənə deşmən hisobış kardə ki detosə bə ısət hiç kəsi əziyyət kardəş ni.

Əv həmçınin, İraği Kırdıston məntəğə referendumi barədə həm votışe: ım referendum bə məntəğə əmniyyəti əleyhe.