Ərbəyin Huseyni çı şiəyon iyən islam dınyo miyono vəhdəti simvole.

İroni prezident aparati rəis Məhmud Vaezi votışe: Ərbəyin Huseyni bo şiəyon və islam dınyo miyono vəhdət və həmdıləti simvole ki muxtəlifə cəmaəton ım ğəhrəmanəti cərəyonədə rolışone.

Məhmud Vaezi İroni cənub ğərbədə Xorrəmşəhri fərmondoriədə bə ımrujnə məntəğə və İroni həssasə vəziyət işorəş kardə və de vəhdəti oqəte zəruriyyati təsdiğ karde votışe: İroni millət hejo sabitış kardə ki əqə deşmən bə İroni nizom zərbə jəe fikədə bıbu İronıjon həmişə vahidə vanqi xıvand bəben və deşmənon vədə mığovimət bəkan.

İroni prezidenti aparati rəis bə Ərbəyin Huseyni mərasim dəvoniyə cərəyonədə milləti rol və koməkon işorəş kardə ijən əlovəş kardə: bo cəmaəti dıl iyən fikədə rohətə şərayeti hozzo kardero ijən əmniyyət və oromətəti icod karde xoto İroni hərbi, icra əkə və intizamiyə ğıvvon bə ko karde məşğulin.

Əmmo çı İraği sərhəddon manitor əkə rəis Kazem Əleğabi tojədən elanış kardə ki detosə cumə ruji bə 1 milyono 200 həzo nəfər nezi zair İraği zəmini və həvoiyə sərhəddonku bə ım kişvər varid bıən.

Bə ım raporti əsos har çiku vey zairon çı İroni Mehran və Şələmçə sərhəddiyə terminalonku bə İrağ varid bən.

Əleğabi bə İronıjə şəhrvandon veyə huzur işorəş kardə ijən təkidış kardə ki İrağədə Nəcəf Əşrəfi airportiku həm veyə mısofiron həvoiyə sərhəddiku bə İrağ daxil bedən.

Xarıciyə zairon barde həm çı İroni Şələmçə sərhəddiyə terminali midir Cəmal Həmidi bə İrna aqentiyəti xəbəş doə ki detosə bə ısət 30 həzo xarıciyə zair veyni Russiyə, Livan və Pakistoniku bə İrağ varid bən.

Əv təkidış kardə ki İronıjon mıəyyən bıə vırəonədə de eşği çı xarıciyə zairon ğəbul kardən ta bə Kərbəlo rəse xoto bəvonro problem və saxtə şərayet məbu.