Viyanaədə çı İroni ətomiyə təvafuği mıştərəkə bərnomə kəmissiya 10 minə iclos.
De İroni heyəton iyən 5+1 qrupi nəmayəndəon huzuri ımruj Viyanadə İroni ətomiyə təvafuği mıştərəkə bərnomə kamissiya 10 nə iclos bərpo bəbe.
İroni ətomiyə təvafuği mıştərəkə bərnomə kamissiya 10 nə iclos de İroni xarıci vəziri moavin Əbbas İrağçi və Avropa i bemoni xarıci siyasəti moavin Helqa Eşmiti rəisəti iyən 5+1 qrupi siyasi rəsmi şəxson ğərare ki bərpo bıbu.
Əbbas İrağçi zinə bə jurnaliston çı ımrujnə iclosi mehvər və hədəfon barədə votışe: ətomiyə mıvzoon, İroni qiədə bıə toon de tərəfiyə həmkarion ijən mıvcudə təhrim və problemon hal karde çəmə muzakirəonədə ğeyd bəbe.
Jıqonə icloson har 3 manq i kərə bərpo bedə ki çəy oxonə qılə Septiyabri 19ədə ijən Niyoyorkədə bərpo bıə be.
Im iclos qıləy şəroyetdə bərpo bedə ki Amerkə prezident Donald Tramp Oktiyabri 23 ətomiyə təvafuği barədə İroni əncom doe fəaliyətonış rəd kardə və ijən ım təvafuği mıddəti dıroz karde ğəroli bə Amerkə konqıresi qi noəş be və hol ım ki de konqıresi bə kəno mande ijən prezident və Amerkə dıvlət bəbe İroni ətomiyə təvafuği barədə ıştə ğəroli elan beko.
Amerkə xarıci vəzir Reks Tilerson tojədən iddiyaş kardə ki İroni ətomiyə təvafuğədə vey problemon hestin ki bəbe həl bıbun.
