Osmoniyə surəon-56

Osmoniyə surəon-56

In bərnomədə de Kərimə-Ğıroni ponzəminə surə bıə Hicri mıborəkə surə oşno bəbemon.ın surə 99 qılə ayəku iborəte ki,Hicrəti bənav Məkkədə bə peyğombər(s)-i nozil bıə.

Çın surə nom bə həştominə ayədə bəhs bıə “Əshebi-Hicr”-i (Saleh(ə)-i ğovm)- i xoto Hicr noey bıə.bın surədə çı kofiron bə Ğıron iyən Peyğombəri(s) ğandə norəvoə behtonon işorə bıə.xorafatpərəstə kofiron komilə ağli soyb bıə peyğombəri məcnun iyən beməxətiyədə ittihom kardedəbin və Ğıroni çı divonəon votə həzyon iyən bemənoə sıxan zıneydəbin.çın surə ayəon bə Xıdo Rəsuli(s) dılvandi iyən təsəlli doə holədə əy çı deşmınon hiyləon mığobilədə bo səbr kardey dəvət kardedə.

Hicri mıborəkə surədə bə  xılğəti məbdə zıney iyən de aləmi qırd vırə mutaliyə kardy ro bə Xıdo imon vardey işorə kardedə və bəvədə bənə Ğıroni əhəmiyyətə iyən əzəməti,miad iyən yavə ko soybon cəzo, Odəm(ə)-i xılğət iyən İblisi yoləşəxəti daston və dəvardə kali etnoson sərquzəştonku bəhs bıə.

سم الله الرحمن الرحيم

الَرَ تِلْكَ آيَاتُ الْكِتَابِ وَقُرْآنٍ مُّبِينٍ (1) 

 Əlif.Lam.Ra. Əv(osmoniyə) kitobi ayəon və ruşin iyən ruşinəkə Ğırone.

رُّبَمَا يَوَدُّ الَّذِينَ كَفَرُواْ لَوْ كَانُواْ مُسْلِمِينَ (2) 

 Çı veye kufr kardəkəson ki,oruzu kardedən ey kaş mısılmon bıəbin.

ذَرْهُمْ يَأْكُلُواْ وَيَتَمَتَّعُواْ وَيُلْهِهِمُ الأَمَلُ فَسَوْفَ يَعْلَمُونَ (3) 

Əvoni (bəçəvon ıştən) holi vadə ta bıdə bəhən iyən bəhrə bobən iyən çəvon oruzon çəvon sə bıtaspıno. çən,rəyrə (ıştə lağeyd bıey nəticə) səbərəseyn.

In ayəon Kərimə-Ğıroni əzəməti bəyon kardə holədəd,bə de ilahi ruşinə ayəon mıxolifət iyən inodkorəti koyədə isror kardə kəson çəşnavi doydə ki,qıləy ruj bome bərəse ki,əvon ıştə çın yavə inodkorəti koy oxoku peşmon bəbeyn.bə zəmon mumkine ın kofiron oruzu bəkardeyn ki,ey kaş mısılmon əbim.bın zəminədə İmom Sadığ(ə) hamyedə:ğıyoməti ruji fəğət islom vardə kəson və mısılmınon bə vəhışt varid bəbeyn.bın zəmon co milləton oruzu bəkardeyn ey kaş əmə mısılmon bıəbimon.

Peşonə ayə de qıləy zumandə ləhn iyən tərzi  votedə:ha pəyğombər ha! əvoni bəçəvon ıştən holi va bıdə(əvon bənə çolınqon)bəhən və çın rədəvardə dınyo jimoni ləzzətonku bəhrə bobən iyən çəvon oruzon çəvon sə bıtaspıno, əmmo rəyrə əvon həyğəton dərk bəkardeyn.ımon bənə çolınqə heyvononin ki, fəğət maddi ləzzət iyən xorəkonku co çi famedənin və bımon rəseyro har curnə cəhd kardedən. məğurəti, ğəflət iyən diyəroə oruzon jıqo əvonış deştə məşğul kardə ki,həni çəvon bo çın aləmi həyğəton dərk kardero zu və ğudrətışon mandəni.əmmo çoko ki,çı ğəfləti pardəon bə kəno noey bıbu və əvon çı marde astanədə ğərol bıqəton və ya ğıyoməti ruji bıvindon, dəbərəseyn ki,çanədə ziyonışon kardə iyən bədbəxt bıən.

In ayə çı mol iyən oruzon kardə insonon barədə bə qıləy zərifə nuktə işorə kardedə.ruşine ki,umu iyən oruzu çı bəşəri jimoni çəxon qardey amile və ehanə qıləy oruzu iyən umu çı milləti dılonku peqətey bıbu, kamə insonon de ko iyən fəaliyyəti məşğul bəbeyn.peyğombər(s) hamyedə:”umu bəçımı umməti rəhməti boyis bəbe.əgər umu nur nıbu,hiç qıləy inə bəştə hırdəni şıt nibədoe və hiç qıləy boğbon toğə nibəkaşte”.

Əmmo əgər həmonə umudəvo ıştə həddoku dəvardo və bə qıləy puçə oruzon oqardo,bə insoni inhirorof iyən bədbəxti boyis bəbe.bənə jimon iyən ovdonəti boyis bıə voşi ovi.əmmo əgər voş həddiku ziyodə bıvoy,oveyz iyən vironəkə surətədə zohir bəbe.Kərimə-Ğıron təkid kardeeə ki,dırozə oruzon iyən puçə umuon insoni bə xiyolon vadar bəkarde iyən əy çəy əsliyə məğsədiku obəqəte.