Osmoniyə surəon-57

Osmoniyə surəon-57

إِنَّا نَحْنُ نَزَّلْنَا الذِّكْرَ وَإِنَّا لَهُ لَحَافِظُونَ (9)

 Həyğətən,əmə Ğıronımon nozil karde və hukmən əmə ıştən əy hifz bəkamon.

Çı kofiron bə pəyğombər(s) iyən Ğıroni istehzo iyən bəhonə vardey dəvomədə,ın ayə qıləy həyğiyə əsosi bəyon kardedə və hamyedə ki,Kərimə-Ğıron qıləy çoye ki,Xıdovəndi ıştən əvış pekardə.əve hamuş nibəbe.əv qıləy həşiye ki,hiç vaxti ğurub nibəkarde.zira Xıdovənde-Xalığ ıştən əy nığo bədoe obəqəte.ehanə qırd zolımon,ğudrəti soybon iyən alimon dast bə dast bıdon ta ın nur iyən ço okışton,hiçvaxəti bə ın ko ğadir nibəbeyn.çıro ki,Xıdovəndi ıştən Ğıronış çı harcurnə təhrif,kam iyən ziyod beıyku hifzış kardə.çanədə ki,ın dınyo bağiye,ın hidoyəti mənşur iyən nizomnomə əbədi bəmande.

Vəhyi ənıvışton Ğıroni bə pəyğombəri nozil beıy bəpeştə de dığğəti əy nıvıştedəbin iyən yaddaşt kardedəbin.Əbu Əbdullah Zəncani Ğıroni tarıxi kitobədə voteydə:peyğombər(s) çandə qılə vəhyi katibonış hestebe ki,əvon vəhyi ayəon nıvıştedəbin.əvon umumən çılı se nəfəriku iborət bin ki,çəvon həmməysə məşhurə qılə sıftənə ço qılə xəlifə bin.əmmo çımon həmməysə vey Zeyd ibn Sabit iyən Əli ibn Əbitalıb(ə) de peyğombəri bın ko əloğədor bə ico bin.

Qırd mısılmınon ısət çı sınni bıbu ya şiyə,yeksan formədə etığodışon heste ki,Kərimə-Ğiron bə hiç qıləy təhrifi məruz mandəni və çəmə ımrujnə dastədə bıə Ğıron eyni hejo həmonə Ğırone ki,peyğombəri(s) zəmonədə bıə.hətto çəyku iqlə kəlimə həm nə bəkam bıə və nə ziyod.de ın tərtibi ım ilahi kitob vəhyi nozil bıə zəmoniku de tobə ısətnə əsri qıləy məcmuə surətədə bəy hiç qıləy dast qıniyəni,jəqo hejo bəmande iyən ıştə şua bo hidoyəti dumo bıə bəşəri dəbətovne.

Imruj həmməkəs şoyde ki,çı islomi deşmınon bə Ğıroni ələyh bıə mıxtəlifə hiyləon bə qıləy vırə rəsedəni.bəlkəm,bəşəri elm çanədə həm ziyod bıbu,çın kitobi sırron iyən həyğətonku ziyodə pardəon bə kəno noey bedə və alimon bə çın kitobi həxədə zərifə nuktəon dast pəydu kardəşone.Kərimə-Ğıron,çı mısılmınon əsosə ğanun,jimoni ğaydəon umutəvə hukumətdorəti ro nışon doə iyən hərəbaxtəti kitobe. Əli(ə) Kərimə-Ğıroni barədə hamyedə:Xıdovəndi bə pəyğombəri(s) qıləy kitobış nozil karde ki,onıkışiyə nure və veyə ruşnə doə çoye ki,bə toykəti tərəf şeydəni.qıləy roye ki,ıştə odəmon bə zəlolət eğandeeəni və bə həxı çı botıliku co bıey boyis bedə ki,çəy burhan iyən dəlilon hamuş bedəni.(Nəhcul-Bəlağə,198-ə xutbə).