Osmoniyə surəon-58

Osmoniyə surəon-58

Çın surə 26-ə ayəku de tosə 42-ə ayəon bə xılğəti vey yolə şedevri yəni insoni ofəyəvonəti işorə kardedə və de çandə qılə məzmuni pur bıə ayəon çın xılğəti cuziyyaton və detalon oj kardedə.ın ayəon bə yod dənoydə ki,Xıdovənde-Xalığ insonış çı tuliku ofəyəşe və bəyış con baxşəşe.de qıləy co iborəti bəşəri əsl iyən rişə çı tulikuye.çı insoni baği mandey həm çı tiliku perəsə maddə iyən xorəkon girovədəy.kali ayəonədə bə ın mevzu dığğət kardey bıə ki,bəşər sıftədə çı tuliku ofəyə bıə və peşo de nutfə vositə hovuj iyən ziyod bıə.əmmo insoni əsl iyən barə məğam,bəçəy ilahi rufi xotoye ki,Xıdovəndi bəy pu kardəşe.bə həmınə dəlili xotoye ki,insoni ın ləyoğətış heste ki,ıştə təkamuli royədə ıştəni de ilahi ləyoğətinə sıfəton dərosti.həmçinin bın ayəonədə çı məlayikon bə Odəm(ə)-i bıə səjdə iyən İblisi bəştə yoləşəxəti xoto,əy inkor kardey həm işorə bıə.ın macəra Ərafi mıborəkə surədə həm omə ki,əmə çəy dastonımon bəyon karde.bə ın nuktə dığğət kardey lozıme ki,iyo Xıdovənd təkid kardedə ki, şəytonon imonin iyən ixlosinə insonon bə dast dənoy koyədə ociz bəmandeyn.əvon fəğət bəvon pemandə kəson bəştə tor eğande bəzıneyn.

إِنَّ الْمُتَّقِينَ فِي جَنَّاتٍ وَعُيُونٍ (45) ‏

 Həyğətən,pərhizkoron boğon iyən honiyon(kənoədən).

ادْخُلُوهَا بِسَلاَمٍ آمِنِينَ (46) 

 (Bəvon xitob bəbe)De səlomətəti iyən əmno-əmniyyəti bə boğon varid bıbənən.

وَنَزَعْنَا مَا فِي صُدُورِهِم مِّنْ غِلٍّ إِخْوَاناً عَلَى سُرُرٍ مُّتَقَابِلِينَ (47) 

 Və əmə harcurnə kin-kudurətlımon çəvon sinəonku kandemone(şodemone) qıləy holədə əvon qırd boən və deyənde dimbədim çı taxton səpe ğərolışon qətə.

لاَ يَمَسُّهُمْ فِيهَا نَصَبٌ وَمَا هُم مِّنْهَا بِمُخْرَجِينَ (48) 

 Əyo bəvon hiç qıləy sıstəti iyən əziyyət nibərəse iyən çəyo bə bi beşənin nin.

Bın ayəonədə vəhışt iyən ilahi maddi və mənəvi nemətonku sıxan votey bedə.pərhizkoron vəhışti havzə boğonədə zulol iyən pokə çeşmənonədə bəbeyn.çı boğon təbir ki,Kərimə-Ğıroni veyə ayəonədə omə və həmçinin çeşəon təbir omə,ın həyğəti ruşin kardedə ki,vəhışti neməton nevbənev iyən mıxtəlifin.Ğıroni mıxtəlifə ayəonədə bə vəhışti curbəcurə çeşmənon işorə bıə ki,ğasbu ım çı insoni bın dınyoədə kardə çokə koon və əməlon təcəssım bıbu.