Osmoniyə surəon-72

Osmoniyə surəon-72

Məryəm(ə) çı həzrəte İsa(ə)-i inəy və çı Kərimə-Ğıroni nonzəminə surə nome. In surə Məkki surəy və 87 qılə ayəku iborəte.

Məryəmi(ə) mıborəkə surədə Xıdovəndi bəşorət iyən çəşnaviyon ibrətamizə hekoyəon ğolibədə bəyon bıə.çın surə ayəonədə bə həzrəte Zəkəriyya(ə),Yəhya(ə),Məryəm(ə),İsa(ə) iyən tohidi ğəhrəmon İbreym(ə)-i və bə co ilahi peyğombəron sərquzəşton i hissə işorə bıə.çın sər quzəştonku har qıləyni ıştədə erjin iyən tərbiyəviyə nuktəon ehtivo kardedə.çın surə ayəon dəvomədə bənə ğıyomət,mucrim iyən yavə ko soybon tale,pərhizkor iyən təğvaninə şəxson mıkoafat,Xıdovəndi fərzəndi soyb bıey inkor kardey və co mevzuon həxədə bəhs bıə.

Məryəm(ə)-i surə iminə ayəon ilahi yolə pəyğombər bıə Zəkəriyya(ə)-iku bəhs kardedə.Kaf-ha-ya-əyn-sad  pərvərdıqori bəştə bandə Zəkəriyya(ə) nisbətədə bıə rəhməti bə yod dənoydə.

De əbaxş iyən mehribonə Xıdo nomi.Kaf,ha,ya,eyn,sad.(bın surədə)ıştı pərvərdıqori lutfiku bəştə bandə

Zəkəriyya nisbətədə zikr kardey(bə miyon omə).qıləy zəmon ki,ıştə pərvərdıqorış de qıləy ahəstə sədo vanqış je. Zəkəriyya voteşe:Xıdolimha! Həyğətən,çımı astə sıst(lır) bıə iyən çımı səy mu bə piyəmerdəti xoto,sipyi bıə.Xıdolima! mı hiçfaxti tıni vanq jıeyədə(çəy icobətiku)məhrum bıənim.və həyğətən,az ıştə mardey bədiqə ıştə nezə odəmon iyən ıştə besonə jeniku tarsedəm.çən,ıştə tərəfiku bəmı qıləy canişin (fərzənd)ətokə. (Xıdolimha! Bəmı qıləy canişin ətokə ki)çımı iyən çı Yəğubi nəsli varis bıbu və Xıdolimha! əy ıştı çəyku rozi bıə kəsonku ğərol bıdə.

(Nido ome)ha Zəkəriyya ha!əmə bətı de qıləy Yəhya nomo bıə zoə(fərzəndi)mıjdəvoni doydəmon iyən çımi bənav ım nom bo hiçkəsi noey bıəni. (Zəkəriyya) voteşe:Xıdolim ha!çoko çımı zoə bıey bəzıne qıləy holədə ki,çımı jen besone və az bə piyəmerdəti xoto zəyif bıəm? (firiştə voteşe:)jıləvoniye,ıştı pərvərdıqori hamyeşe:ım ko bomı hostone.zira çımi bənav tınım ofəyə,qıləy holədə ki,tı hiççi nıbiş.

Peşonə ayəon bə Yəhya(ə)-i nıbuvvəti işorə kardedə.Yəhya(ə) ilahi yolə pəyğombəronku be.çə həzrəti xısusiyyətonku ımbe ki,əv hırdənəti zəmonədə bə pəyğombərəti məğami rəsəbe.Xıdovəndi çəy kamə sinnədə jıqo bəy ağl,huş iyən diroyətış əto kardəbe ki,oxoyədə əv bo ilahi yolə pəyğombərəti məğami ğəbul kardeyo loyığ vindey be.Kərimə-Ğıron Yəhya(ə)-i macəra nəğl kardey bəpeştə,sıxani mevzu bə həzrəte İsa(ə)-i dastoni və bəçəy moə Məryəm(ə)-i sərquzəşti tərəf bardedə.bın ayəonədə çın dıqlə macəra miyono nezə rabitəon mışohidə bedə.Yəhya(ə) çı qıləy besonə pı-molu bə dınyo oməbe və İsa(ə) çı şuş nıbə inəku.Yəhya(ə) əğıləti vaxtədə bə pəyğombərəti məğam rəse və İsa(ə) həm insoni bə təəccıb vardə surətədə qofoyədə ıştə vardə kitob iyən nıbuvvətiku qəpış je və har dıqləyni Xıdovəndi ğudrəti dıjdə ayəonku bə hisob omeydən.

Məryəm(ə) çı İmrani kinə iyən İsa(ə)-i inə və qıləy pərhizkor,pokdovnə iyən ləyoğətinə jen be.de Ğıroni təbiri Xıdovənde-Xalıği əvış vıjniye,pokış karde iyən bəsə aləmi qırd jenonsə bəpeş qəte.Məryəm(ə)-i daston  de qıləy vey ğəşənq iyən təsirəkə şivə bəyon bıə.ın surə çı jeni həyğətədə,pokdovnəti,fəzilət iyən erji məğami bəyon kardedə.qıləy jen ki,bə insoniyə kəmoli veybarzə etapi dastış pəydu kardə və Xıdovəndi bəy xitobış kardə.

Məryəm(ə)-i mıborəkə surədə 20 qılə ayədə çə həzrəti bardə omə.joqo ki,hamyedə: Və bın kitobədə Məryəmi bə yod dənə bə zəmon ki,ıştə xıyzoniku co be qıləy şərğiyə tərəfədə ğərolış qəte.bə zəmon ki,çı cokəsonku bə diyəro boştə qıləy pardə ğərolış doe.bın zəmon əmə ıştəku (Ruhul-Ğudusro) bəçəy tərəf vığandemone.çən,əv qıləy komilə insoni şikilədə bəçəy çəş çiye.(26-17)

Məryəm(ə) qıləy xəlvət və sakitə məkonış vıjniye ta hiç qıləy norohətçiyəti nıbə holədə de Xıdovəndi razo-niyozi məşğul bıbu.əmmo,əv ki,hejo de pokdovnəti jiyəbe və məxloği miyono çı təğva iyən pokəti misol be,ıştə xəlvət kardə məkonədə qıləy ğəribə merdış mışohidə karde və vey tarse.əve bilafosilə voteşe:həyğətən,az ıştıku bə Rəhman bıə Xıdo pənoh bardedəm! ehanə tı pərhizkoriş?(çımıku bə diyəro bımand).