Zeynəbe-Kubra,çı eşğ iyən ğəhrəmonəti banu
Zeynəbe-Kubra,çı eşğ iyən ğəhrəmonəti banu
Hicri-Ğəməri 63-ə sori rəcəbə manqi ponzədə qıləy dıjdə banu və xanım,bə bə həxı vindemoni ləbbeykış vote ki,çı islomi tarıxi tale həlləkə zəmonədə qıləy əbədiyə rolış ifo karde.Zeynəb(s) nom hejo de İmom Huseyn(ə)-i Kərbəlo əzəmətinə ğıyomi bə ico kəşə bıə.əv ki, de zılmo-sıtəmi mıborizə bardey rufış ıştə mo Fatimə(s) iyən ıştə pı Əli(ə)-iku bə irsış peqətəbe,çı zılmi ifşo iyən həxı bərpo kardey royədə deştə ğərra və rəsə sədo,ıştə dasto omə har qıləy fədokorəti iyən canfəşonətiş bə vırə rosne.
Əli(ə) iyən həzrəte Fatimə(s) iminə kinə bə dınyo mə zəmonədə,Xıdo-Rəsul(s) səfərədə be. əvon səbr kardeşone ta peyğombər(s) çı səfəku oqardo və bo ım tojə bə dınyo omə hırdəni qıləy nom bıno.i mıddət bəpeştə Xıdo-Rəsul(s) çı səfəku oqarde və bəştə çəşi nur bıə kinə Fatimə(s) kə şe.Əli(ə) həmonə tojə bə dınyo omə tiflış bə pəyğombər(s)-i mıborəkə ağuşış noe. pəyğombər(s) həmonə tiflış maçə karde və çəy nomış Zeynəb(s) noşe.çən,peşo ıştə dimış bəsə həmonə hırdəni dimisə noşe və bın zəmon çə həzrəti çəşi arson çəy mıborəkə dimisə cari be. ərzışon karde:” ha Xıdo Rəsul ha! boçi bəmeydon?”.hamyeşone ki,ım kinə deçımı Huseyni mısibətonədə şərik bəbe.
Zeynəb(s) ıştə jimonış çı hərəbaxtəti iyən kəmoli mərkəz bıə qıləy muhitədə binoş karde.har ruj çəy vucud çı Xıdo-Rəsuli(s) məhəbbət iyən mərıfətiku qıləy tojə con sedəbe.əv fəsohıət uiyən bəloğətış ıştə əzizə pı Əli(ə)-iku,nəcobətış ıştə əziz-qramiyə mo Fatimə(s)-ku,səbr iyən istiğamətış ıştə boon Həsən(ə) iyən Huseyniku(ə) umutışe və əv çı səbr iyən roziyəti bılındə ruf be.Zeynəbe-Kubra(s) har ruj çı Əli(ə)-i elm iyən bəloğətiku bəhrə bardedəbe və çə həzrəti ruf çı Fatimə(s) de məhəbbəti pur bıə dovnədə bə oroməti iyən aşişəti sahili rəseydəbe.jıqo qıləy şəraiyətədə bo həzrəte Zeynəb(s) de ilahi elm iyən maarifon oşno bıey və həmçinin çı əxloği fəziləton dərk kardey fırsəti zəminə hozzı be.
İmom Səccod(ə) qıləy xutbədə bəştə əmmə Zeynəbi(s) jıqo xitob kardeşone:”"Əhəmdulillah,şık bə Xıdo tı qıləy mellim nıvində alimiş və ıştı zotədə qıləy dərk iyən fam heste”.ə həzrət Kərimə-Ğıroni təfsirəkə be və İmom Əli(ə)-I Kufədə bıə zəmonədə ım əzəmətinə banu ıştə kədə məclison təşkil kardedəbe və bo jenon Ğıroni təfsiri dərson bəyon kardedəbe.bə ın dıjdə banu və xanımi çı ziyiodə elmi soyb beıy coqlə şoydəti,çə həzrəti Kufə iyən Şamədə bıə xutbəonin və ziyodə alimon həmonə xutbəşon tərcumə iyən şərh kardəşone.ın xutbəon nışon doydən ki,ə həzrət çanədə bə islomi elmon iyən Kərimə-Ğıroni mısəllət bıə və ımonış çok-çoki zınə.bın xutbəonədə bəhs bıə ayəon,bə etığodi iyən co zəminədə bıə veyə şubhəon cəvobonış doə.
