Osmoniyə surəon-80

Osmoniyə surəon-80

Ənbiya mıborəkə surə Kərimə-Ğıroni visti  iminə surəy və 112 qılə ayəku iborəte.ın surə peyğombər(s) Hicrəti bənav nozil bıə.

Ənbiya mıborəkə surədə şonzə qılə ilahi peyğombəron nom deçəvon holon və vəzyəton bə ico zikr bıə və həm çinin bəçəvon kali qıləyni həm fəğət nomi işorə bıə. əvon iborətin çımiku: Mosə,Harun,İbreym,Lut,İshoğ,Yəğub,Nuh,Davud,Suleymon,Əyyub,İsmoyl,İdris,Zəlkifl,Zənnun(Yunis)Zəkləriyya və Yəhya.həlbəttə,Ənbiya mıborəkə surədə çə peyğombəronku həm sıxan votey bedə ki,çəvon nomon oməni.bənə islomi peyğombər(s) iyən həzrəte Məsih(ə).

In surə veyə vırədə bə kali ənbiya iyən peyğombəron sərquzəşton təkid kardedə ki,əvon çı jimoni tanq iyən bevəcə vəzyətonədə bə Xıdo lutfi təvəssul kardedən və Xıdo ın sıvon zəmonədə çəvon jimoni anqıli oj kardedə və əvoni peroxnedə.bənə həzrəte İbreym(ə)-i macəra ki,çı Nəmrudi otəşi dılədə giriftor bıəbe və ya həzrəte Yunis(ə) ki,bə moy luzi dılə eqıniyəbe.həmçinin Zəkəriyya(ə) ki,ıştə umri həşi ğurubi zəmonədə çı fərzənd iyən canişini soyb be.

Ənbiya mıborəkə surə bə umum məxloği de qıləy zumandə çəşnavi bino bedə.əv həm de qıləy ooğoəkə iyən zumandə xəbərdorəti.joqo ki,hamyedə:

Məxloği hisobi (zəmon) nez bıə.qıləy holədə ki,əvon ğəflətədən(və çəyku)dim qordınəşone.əvon jıqo de dınyo məşğulin ki,ğəflət iyən bexəbəti qırd çəvon vucudış eqətə.vey mumkine ehanə ikəs bəçəvon yod dəno,çəyku dim bəqordınen və bo ğıyoməti barədə bıə sıxanon məsey hozzı nin.peşonə ayəon bə milləti dim qordıney iyən be etino kardey nışonəon işorə kardedə və hamyedə:

Çəvon pərvərdıqori tərəfiku bo əvon jəqo qıləy tojə pand nıome ki,əvon əy nıməson və(ijən) əvon de hənəki sətasponey məşğul bin.qıləy holədə ki,çəvon dılon(çı həxıku ğafil iyən de co qılə çi çəvon) sə taspıə.və(kofiron,bəştə) sıtəm kardə kəson məxfiyonə nəcva(pıçı-pıç)kardedən ki,ayə ın (merd həm) bənə şımə qıləy bəşər ni? ayə çəş vinde-vinde bə sehri tərəf şedon?

Əvon çı Xıdo tərəfiku bıə de ın oğoəkə ayəon ciddi rəftor kardedənin iyən bın barədə fik-fam kardedənin ki,çoko ım sıxanon çəvon taleyədə sərostə təsiriış heste.

Kərimə-Ğıron de həxı joqo rəftorışon bıə kəson rəğ-rişə çəvon dılon de dınyo koon məşğul bıey iyən Xıdo zikriku ğafil bıey zıneydə.joqo kəson nəinki,həxı ğəbul kardedənin,bəlkəm əvon  məxfiyonə surətədə deştə duyə sıxanon məxloği çı peyğombəri sıxanon ğəbul kardeyku oqəteydəbin.əve əvon bə peyğombəron ələyh çandə nev norəvoə behtononku oko doydəbin.əvon bə peyğombəron sehrboz votedəbin və quya əvon deştə sehrinə kəlomon milləti bəştə tərəf cəzb kardedəbin.

Məkkə mışrikon iyən peyğombəri məxolifon bo ə həzrəti şəxsiyyəti təxrib kardero camaati çə həzrəti kənoku iyən Ğıroni bə dıl nıştə ayəonku bə diyəro kardey xoto,de mıxtəlifə formə bəhonəon vardedəbin.qahi vaxti əy qıləy addiyə bəşər hisob kardedəbin və votedəbin ki,çəy sıxanon nufuz ğərəz sehri co çi ni.joqo ki,hamyedə: (Peyğombəri)voteşe:çımı pərvərdıqor osmon iyən zəminədə bıə har qıləy sıxani zıneydə.əv əməs, əzıne.(kofiron)voteşone: ım vəhy ni,bəlkəm həvulconi(bəyənde qıniyə) hanonin və əvonış duyədə bə Xıdo nisbətış doə.bəlkəm əv qıləy şayire.çən,ehanə rost voteydon,bəbe bənə navnə peyğombəron ki,(de mecuzə) vığandey bıəbin,əv həm boəmə qıləy mecuzə biyəy.

əvon votedəbin:pəyğombəri de vəhyi nomi vardə çi,bəçəy bə yənde qıniyə hanon xotoye və əv həyğət ni.əvon votedəbin:əv qıləy duyəvıjə merde ki,bə Xıdo iftiro ğandedə və çəy sıxanon Xıdo tərəfiku ni.kali vaxt əvon jıqo votedəbin:əv qıləy şayire ki,çəy sıxanon çəy təxəyyuliku bə əməl omə sıxanonin.əvon iddio kardedən ki,ehanə peyğombər rost vetədə ki,çı Xıdo tərəfiku omə,bəbe bənə navkonə pəyğombəron qıləy mecuzə biyəy.çəvon bə peyğombəri(s) ələyh bıə hərəkəton nışon doydə ki, əvon çı həyğəton dumo bıənin və deştə vardə vavunəon peyğombəri(s) çı meydoniku bekardey dumo bıən.  

Ənbiya mıborəkə surə ayəon dəvomədə hamyedə ki,tarıxi dırozi qırd peyğombəron çı bəşəri cinsiku bıən və Xıdovəndi hiçvaxti qıləy mələk və firiştəş bo pəyğombərətiş vığandəni.joqo ki, hamyedə: Və(ha peyğombər ha! vuji:)əmə ıştı bənav(hiç qıləy)peyğombər nıvğandemone mələk bıbu,əvon həm merdon bin ki,əmə bəvon vəhy kardemone.çən,əgər zıneydəniyonbu,çı zınə kəsonku xəbə bıstənən. və(həmçinin)əmə əvonımon xorək nıhardə bədəm ğərol nıdomone iyən çəvon əbədiyə umrışon nıbe (ki nımardon).

Peşo əmə bəvon doə və`dəon bə vırə rosnemone.çən,əvon iyən hakəs ki,piyemone nicot domone və isrofəkəyon həlok kardemone.Həyğətən,bə şımə qıləy kitob nozil kardemone ki,boşımə xoto qıləy pande.ayə fik-fam(əndişə) kardedəniyon?