Osmoniyə surəon-82

Osmoniyə surəon-82

Ənbiya mıborəkə surə 48-ə ayəku jəqoşə,çı ilahi peyğombəron de dərsamizə nuktəon bə ico bıə jimoni mərhələonku bəhs kardedə və hamyedə: Və həyğətən,əmə bə Mosə və Haruni Furğan,nur(ruşnə əbaxş) və bo təğva əhli qıləy pand-nəsyət əto kardemone.(həmonə) şəxson ki,ıştə pərvərdıqoriku məxfiyə holədə (əy nıvində holədə) tarseydən və ğıyomətiku tarsışon heste.(48-49)

Bın ayəonədə bənə həzrəte Mosə,İbreym,Nuh,Lut iyən Əyyub-i bıə ilahi peyğombıron xısusiyyəton bəyon kardedə. Subhanə Xıdo xəbə doydə ki,çəy bə ın peyğombəron əto kardə neməton bəçəy xotoye ki,əvon çı muşkilat iyən problemon zəmonədə ıştəku səbr iyən hovsələ nışonışon doe və saxtə imtovonon vaxti səbarz iyən səbılınd bə bi beşin və əvon umumən çı istiğamət iyən sabitəti ulqu bin.

Ənbiya mıborəkə surədə hamyedə ki,çəvon pərvərdıqor əvonış bəştə rəhməti daxilış karde.çıro ki,əvon saleh iyən ləyoğətinə şəxson bin.odəmi dığğəti cəlbəkə nuktə ıme ki,voteydəni əmə ıştə rəhmətımon bəvon baxşemone, bəlkəm hamyedə:əvonımon bəştə rəhməti dılə varid kardemone.jıqo bızın əvon deştə qırd vucud iyən coni bə ilahi rəhməti ğərğ bıəbin,çoko ki,çəy bənav bə işkil iyən muşkilaton dılə ğərğ bıəbin.

Davud(ə) min cumlə çə pəyğombəronku be ki,çı Taluti bəpeştə bə ğudrət rəse.əv çı camiyə siyosi iyən ixtisodi koonış de ağılmandəti iyən tədbiri idorə kardedəbe.çəy Suleymon nomədə qıləy fərzəndış hestebe ki,çı elm iyən hikməti soyb be.Ənbiya mıborəkə surə 78-ə ayə bə həzrəte Davud(ə) iyən Suleymon(ə)-i barədə qıləy ğəşənqə dastoni işorə kardedə: Və Davud iyən Suleymoni(bə yod dənə)bə zəmon ki,qıləy ğovmi pəson şanqovənezi kaştemoni sahə(məhsulış)viron kardəbe,hukmışon doe və əmə bəçəvon hakiməti şoyd bimon.

Dı nəfər boştə miyono bıə ixtilofi həll kardero çı Davud(ə)-i palu omin.çəvonku qıləyni voteşe ki,çın merdi pəsə ğələ bəşəvnəy bəçımı anqı boği daxil bıə və çımı anqı doon livə və xıçəonış hardə və zay kardəşone.Davud(ə) hukmış karde ki,çəy çın dıjdə xəsorət iyən ziyoni mığobilədə bəbe pəsi soyb ıştə qırd pəson bə ziyon vində boği soybi bıdo.əmmo Suleymon(ə) ki,bə zəmon qıləy qədə hırdən  be,bəştı pı voteşe:ha Xıdo yolə pəyğombər ha! ın hukmi əvəzkə!Davud(ə)-i voteşe ki, çokonə? Suleymon(ə) bo ziyon vində boği soybi coqlə ro təklifış doe.əy voteşe:çun pəson çəy boği sahə mənfəətışon zay kardəşone, nəinki,çı sahə ıştən.çən,çı pəsi soybi çəy əvəzi bə ikkərə doey əvəzi,bəbe çı pəsi mənfəəton ki,çı şıt iyən paşməku iborəte,de tobə isori bəbe bə boği soybi bıdo.de ın tərtibi həm çı boği soybi ziyoni əvəz beşey bedə və həmən çı pəsə ğələ soyb bə ikkərə ıştə sərmoyə ıştə dastiku nibədoe.

Çən,əmə həmonə (həxə hukmımon)bə Suleymoni dərosnemone və əmə bəçəvon har qıləyni hikmət iyən elm əto kardemone və bandon bo Davudi ram kardemone(joqo ki,əvon) iyən pərəndəon (de əy)təsbih voteydəbin və əmə ım koon əncom doydəbimon.(79)

De ın tərtibi de Xıdovəndi təsdıği Suleymon(ə) bo ın ixtiliofi həll kardero qıləy çokə təklifış doe.

Ayə dəvomədə bə har dqılə pəyğombəri risoləti təkid kardedə və hamyedə ki,əmə bə Davud(ə) iyən Suleymon(ə)-i elm iyən hikmət əto kardemone.peşo bə Xıdovəndi bə Davud(ə)-i əto kardə neməton qıləyni işorə kardedə və hamyedə:bandon iyən pərəndəon həm deçəy təsbih iyən sıtoyişi bə ico və bəy sədo doə holədə,de Xıdovəndi sıtoyişi ko məşğul bedəbin.həlbəttə,ın mevcudaton de Davud(ə)-i sıtoyişi bə ico bıey,bo ə həzrəti nıbuvvəti isbot kardero qıləy qıləy ilahi mecuzə be.

Davud(ə) nəin ki,dıvo əhl iyən Xıdo zikr kardedəbe,bəlkəm Xıdo royədə de cihod iyən canqi həm məşğul bedəbe və bo mıcohidon çı deşmıni zərəilu oqəteyro boəvon zirehış həm soxte.Davud(ə) de osoni sı iyən nam kardey,sıftədə çı zirehi həlğə və dayirə hozzı kardeəbe,çən peşo əvoni bəyənde daxil kardedəbe və zireh boftedəbe.bın zəminədə Ənbiya mıborəkə surə 80-ə ayədə haçmyedə: “Və əmə bo şıməro bəy zireh soxte fəndımon umute ta şıməni canqon(xətəriku)oqəto.çən,ayə şımə(ısət) şukr kardedəniyon?”.