Osmoniyə surəon-83

Osmoniyə surəon-83

Və Zun-Nuni(moy soybi bəyod dənə)bə zəmon ki,ğeyzin (və çı məxloğiku bə bi) şe və qımon kardedəbe ki,əy bə mehnəti dıço nibəkamon.(əmmo çoko dıjdə moy əvış ebordıne)çən,həmonə toykiyə vırədə vanqış je:Xıdolim ha!sovə tı co qıləy məbud ni.tı pok iyən mınəzzəhiş!(və)həyğətən,az çı sıtəmkoronku bıəm. çən,çəy dıvo icobət kardemone və əvımon çə ğəmiku nicot domone və əmə jıləvoni mominonro nicot doydəmon.

Ənbiya mıborəkə surə 87-88-ə ayəonədə bə həzrəte Yunis(ə)-i jimoni işorə bıə ki,çandə soron camaatış bo i bıə Xıdo pərəstış kardero dəvətış karde.əmmo oxoyədə milləti kamə hissə bəy imon vardeşone.boçımi xoto əv vey ğeyzin be və bəştə ğovmi nifinış karde iyən çəvon miyono xaric be şe.əmmo Xıdovənd ıştə məmuriyyəti tərk kardey xoto,bə Yunis(ə)-i cəzoş doe və əvış bə bəlo dıçoş karde.Yunis(ə) bə kəşti suvar beyədə,qıləy balina bə kəşti həmləş karde.çı kəşti soyb məcbur mande və bə ğərol ome ki,ıştə sərnişinonku qıləyni bə dıyo şodo ta həmonə dıjdə moy bəçəy soyəx bışo və kəştiyədə bıə kəson con perəxo. əve boçımi xoto əvon pışkışon ğande və oxoyədə pışk bə Yunis(ə)-i nom eqıniye.əvışon bə dıyo şodoşone və həmonə balinə həm əvış ebordıne.əmmo de ilahi əmri əv çı balinə mədədə həzm nıbe.Yunis(ə) çı həmonəə dıjdə moy luzi tanq iyən toykiyə vırədə bəştə risoləti koyədə bıə səbr nıkardeyış etırofış karde və Xıdovəndiku ıştə əfv və baxşeşış tələb karde.Mehribonə Xıdo həm əvış əfv karde iyən əvış çı moy ləvəku peroxneşe.

Və həyğətən,əmə  çı Zikri (Tovrati)bədiqə bıə Zəburədə həm nıvıştemone ki,hukmən çımı salehə bandəon zəmini(hukuməti) varison bəbeyn. (105)

In ayə nəhoyətədə həxı bəsə botılisə bıə səbarzəti ki,ım çı Xıdo və`dəon ruşinə qıləyniye-işorə kardedə və mıjdəvoni doydə ki, saleh iyən ləyoğətinə şəxson zəmini dimisə hukumət bəkardeyn. ın məsələ çı Kərimə-Ğıroni elmi ecozonku iyən çəy vəomə tarıxıku çı naviku xəbə doə məlumatonku bə hisob omeydə.bo ın mətləbi ruşin bıey xoto,vey çoke ki,bızınəmon bın ayədə işorə bıə salehə bandəon kom şəxsonin?

Kərimə-Ğıroni fərhənqədə saleh iyən ləyoğətinə şəxson məxsusə xısusiyyətonışon heste.ım şəxson har cəhəto çın ləyoğəti soybin. əməl və təğva cəhəto.elm,aqahəti iyən ğudrəti cəhəto və iştimayi tədbiri,tənzimi iyən dərki zəminədə bıə ləyoğət.

Çoko ki,Xıdo bandəon de bəy imon vardey iyən deştə mucohidət və cəhdon ım ləyoğəti boştə hozzı kardedən,Xıdovənde –Mutəal həm bəvon komək kardedə ta çı yoləşəxə şəxson vini iyən bukə bə zəmini bımolo və çəvon daston bə dınyo hukumət kardeyku bıbırno və salehə şəxson çı zəmini varison kardedə.

Həlbəttə,ğasbu çı insononku veyni ki,de zolm iyən təcavuzkorə hukuməton bə ivrən,bovə nıkon ki,ın hukuməton bə dınyo xılğəti ğanunon əks ofəyə bıən və de xılğəti soxtemoni həmahənq bıə çi,həmonə çı Xıdo salehə bandəon zəmini dmisə bıə hukuməte.

Çın məsələ izohədə bəbe ımi bıvoti ki,xılğəti sistemədə umumi iyən mınəzzəmə ğanunon,bə hestemoni aləmi soxtemoni vahidəti iyən de yənde rabitənin bıeye.məsələn,vindedəmon ki,

alimonku i dastə cəhd kardedən de mıosirə elmi əbzoronku oko doey,çı ovşum iyən həşi hərəkəti formə de dığğəti mıhosibə kardedən ta insoni bə kosmosi bıə səfəon zəminə hozzıkon.de tikəy fik-fam kardey əmə sərəseydəmon ki,çı alimon ın hərəkəton həyğətədə bə həşi qalaktikə iyən co planeton dəğiğə nəzmi ğarzıxoe.zira ehanə ım planeton həto çəşi bəyənde jey ğədərədə həm boəvon tənzim kardə bıə ıştə xəttiku beşon,qırd elmi mıhosibəon bəyənde bəqıniye.bəvədə məlum ni çı kosmosi sərnişinon ağıbət çokonə bəne və əvoni çiç çəş kardedə.

Isət həm əmə çı planeton aləmiku bə vey qədə dınyo ğədəm şoydəmon.iyo məxsusən bəyjiyə mevcudaton vəzyəti təhğiğədə nəzm,qıləy ekzotik iyən əcib-ğəribə məfhun boştə peqəteydə və bəvədə hərcı-mərc mevcud ni.məsələn,mumkine de insoni mazqi çandə qılə huceyrəon ziyon vinde iyən deçəvon nəzmı-intizomi bəyənde qıniye,çı insoni jimoni təşkilot qıləy dəhşətinə formədə bəyənde qıniyedə.əgər bə insoni bədəmi soxtemoni mırəkkəb iyən curbəcurə dəstqahi nəzəkəmon,dıl iyən mazqikuş qətə de tobə çəş,quş iyən zıvoni və hətto çı səymu rişə həm vindedəmon ki,qırd əvon bə qıləy hisobinə və adilonə formədə bıə ğanun iyən nəzmi tabeyin.deməkə ki,çı aləm qırd cuz iyən hissəonədə qıləy məxsusə nəzm və dəğiğə hisob-kitob heste,əmmo aya bəşəri camiyə çın vəzyəti istisno bıey bəzıne?aya dınyo umumi vəzyəti mışohidə kardey, əməni bə ın fik dənoydəni ki, bəşəriyyət həm bəbe çı hestemoni aləmi sistemi mığobilədə sə təzimko və ım adilonə iyən mınəzzəmə ğanuni ğəbulko və de aləmi dıjdə nizomi həmahənqətiş bıbu?.