Təkfiri cərəyon
Təkfiri cərəyon
Dıqlə navnə proqramədə çı sələfiyon Hindi niməğitə bəpeştə dıminə əsos bə əməl omə vırə bıə Misri sərzəmini barədə sehbət kardemone.Misri sələfiyon bə islomi oqardemoni de bənə Amerkə iyən sehyonizmi bıə islomə deşmınon mıborizə bardey hisob kardedəbin və çı mısılmınon dəboxtey amili həm çəvon çı din iyən çəy erjonku bə diyəro bıey zıneydəbin.çoko ki,çı “İxvanul-Muslimini” məşhurə çehrə bıə Muhəmməd Ğəzzali jıqo bəyonış kardəbe:çı vəhhabiyəti sələfiçəti iyən bə dumo oqardey,bo mısılmınon təkfir kardey iyən əvoni kofir hisob kardey koyədə oko doey bedə və əvon daxili məzhəbiyə otəşi şuləvər kardedən.sələfiyə vəhhabiyon zəmon iyən məkoni şərayiti ıştə nəzədə qəteydənin,irtico iyən bə dumo oqardey qırd bəçəvon əndişə iyən fikon soğnəş eğandə.çı səhobə iyən tabeyini ağl iyən famey bəsə peşonə alimon ağl iyən dərəsesə bənav qətedən və ıştə ağl iyən dərki ğudrəti bə hisob vardedənin. qıləy holədə ki,Misri sələfiyon ısət çı Seyd Camal bıbu ya Əbdu vəə ya Rəşid Rıza bıbu və həmçinin İxvanul-Muslimini alimon nəzəku,peşonə səron ağl iyən fame hiçvaxti mıtləğə şikilədə rədd bıəni.əğayidi cəhətədə həm Rəşid Rıza harçənd de tobə qıləy həddi bə vəhhabi sələfiyon nez be,əmmo islomi tarıxi hodisəon mığobilədə bənə sələfi vəhhabiyon ıştə çəşış vi nıkarde və de səhobə iyən tabeyinon tənğıdi ko məşğul be.əv deməkə ki,bə xilofəti ko etığodış hestebe, əmmo çəy marzon tarifədə çı xilofəti barədə tojə nəzə soybon zumrə və cərqədə ğərolış qəte.Misri sələfiyon hiçcurə çı vəhhabiyə sələfiyon cərqədə ğərol doey əbıni və ın dıqlə usul,metod iyən hədəfon cəhəto komilə surətədə de iyande farğ kardedə.harçənd dəvardə soronədə islomi kişvəron hodisəonədə Misri sələfi cərəyonon bə təkfiri iyən vəhhabiyə fırğəon təbliğati tor eqınin və kali mısılmonə məmləkətonədə de bənə mısılmınon iyən şiyə aklimon kıştey cinoyəton məşğul bin və əvon hətto de təkfiri vəhhabiyon mıxolif bıə əhli sınnəti alimon ğətli vaxti həm tamışon je və deəvon bə ico bin.məsələn çı Əhly-Byet(ə)-i tərəfdoronku şeyx Həsən Məhəmməd Şəhate iyən co se nəfər Misri şiəyonku bə şəhodət rosney vaxti,çəvon bımi reaksiyə nışon nıdoey.ım cinoyəton bə zəmonədə be ki,hələ Məhəmməd Mursi Misri prezdent sarayədə be.əmmo əvon bə şeyx Həsən Məhəmməd Şəhate şəhodəti hiç qıləy reaksiyəşon nışon nıdoe
