Əbbos ibn Əli,fəzilət iyən kəroməton təcəssım
Əbbos ibn Əli, fəzilət iyən kəroməton təcəssım
İroni erməniyə məsihi və xristiyanonku qıləyni votedə ki,qıləy penc sornə hırdənış bə xuni noxəşəti mıbtəlo bıəbe və doktoron ziyodə mualicəon bəpeştə həm ıştə umuş bırniyəbe.Məhərrəmə manqi iminə ruj be və əv deştə mısılmonə hamsuyə ıştə fərzəndi noxəşəti barədə sehbətış karde.əy voteşe:ımruj Məhərrəmə manqi iminə ruje və şımə çı İmom huseyn(ə)-i “Babul-Həvaic” bıvə bıə həzrət Əbbosiku ıştə fərzəndi şifo tələbkənən.çıro ki,əv hiç qıləy dardinə odəmi ıştə bəku tojnedəni.şımə həm bə həzrəti təvəssılkənən və həmən nəzrkənən ki,şımə fərzənd şifo pəydu kardey bəpeştə Məhrrəmə manqi nəvminə ruji ıştə kədə bo həzrət Əbulfəzl Əbbosi qıləy rozə məclisi dəbəvodrıniyon.
In erməniyə inə deştə sinədə bıə ziyodə ğəmi bə həzrəte Əbbos(ə)-i təvəssulış karde və voteşe:Əğə con! mı mısılmon nim.əmmo məsəme şımə həmməkəsi hacəti ğəbul kardedon və şımə Babul-Həvayiciyon.mı qıləy ermənim,əmmo ısət bəşmə kəybə oməm və şıməku tələb kardedəm ki,bəçımı fərzəndi şifo bıdənən.əv çandə ruj bəpeştə ıştə hacətış Əbbos ibn Əli(ə)-iku seşe və ıştə nəzrış ədo karde.
Bəle həzrəte Əbbos(ə) qıləy dıjd iyən mehribonə şəxsiyyəte ki,bə qırd dınyo ozodi piyəkəson məxsuse.çı məsihi iyən xristiyənon,kəlimiyon,aşuriyon və co məzhəbon bə ın mislış nıbə şəxsiyyəti bıə eşğ,bə ın iddio şoyde və İronədə co məzhəbi kamon bə İmom Huseyn(ə)-i ın bəfodorə yavəri aşığin.
Hicir-Ğəməri 26-ə sori(646m) Şəbonə manqiku ço ruj dəvardə nıbe ki,vəhışti vıli bu zəminış bihuş yən məstış karde.Əbbos ibn Əli(ə) bə dınyo ome və deştə omey şoyvonəti bə Əmirəl-Muminini kə varidış karde.çəy omey mıjdəvoni bə Əli(ə)-i doşone və ə həzrət həm tadibəsə bo Əbbos(ə)-i vindero dastpoçə be.Ə həzrət rəyrə ıştənış bəkə rosneşe və həmonə tojə bə dınyo omə məhbubə fərzəndış bəştə vanqo qəteşe və çı həzrəte Əbbos(ə)-i mıborəkə dastonış maçə karde.Əli(ə) zıneydəbe ki,ım daston Aşurə ruji çı İmom Huseyn(ə)-i həmməysə çokə himoyəkə bəbe və səğğoəti medal iləl əbəd de Əbbos(ə)-i nomi tarıxədə dəbəvəşe.çən,peşo bə dıli nıştə əzoni sədoş bə tojə zizə oj kardə vıli quşi zumzuməş karde. Əli(ə)-i zurriyə Əbbos çı Əöhli-Beyti(ə) piyəkəsnku iyən qıləy delavər və fəzilətinə xıyzoniku bıə Fatimiyyə Kilabiyyə nomo qıləy moku bıə ta alicənobəti,şucoət iyən ğeyrəti ayini bə hestemoni aləmi vey diyəroə vıər bırosno.
Əbbos(ə) hiçvaxti ıştə imomiku dastış nıkəşe və hejo bəştə bo İmom Huseyn(ə)-i itoət kardedəbe və çə həzrəti icozə nıbə holədə çəy mığobilədə nışteydə nıbe.əv həmişə bəştə bıvə Huseyn(ə)-i ya səyyidi,ya Əba Əbdillah yəbnə rəsulillah xitob kardedəbe.
Tarıxədə omə ki,Əbbos(ə) qıləy vey reçinə siçaş hestebe.əve bəy "Ğəməre Bəni-Haşim" yəni Bəni-Haşımi ovşum votedəbin.ziyodə tarıxi rəvoyətonədə omə ki,Əbbos(ə) qıləy xosə çehrəş bıə merd be iyən çəy zumandə bədəmış hestebe ki,bə qıləy zumandə asbi nışteyədə çə həzrəti lınqon bə zəmini qıniyedəbe.
