Həzrət Zeynul-Abidin(ə)-i şiə fərhənqi tərvicədə bıə rəftor

Həzrət Zeynul-Abidin(ə)-i şiə fərhənqi tərvicədə bıə rəftor

Şəbonə manqədə Mədinə şəhr de imoməti vılıstoni coqlə vıli zizə kardey vılbaron be və ələviyə buston və boğ bə şoyvonəti ğərğ be.İmom Huseyn(ə)-I qədə,əmmo  de səfo pur bıə kə deçəy fərzəndi nuri ruşin be ki,əzəmət çəy çehrədə oşko be.İmom Zeynul-Abidin(ə) Hicri-Ğəməri 38-ə sori Şəbonə manqi pencminə ruji Mədinə şəhrədə bənə ƏbuƏbdullah(ə)-I bıə kəroməti soyb bıə pıku iyən əzəmətinə inə bıə Şəhrbanuku bə dınyo ome.bə jıqo pı-mo soyb bıey xoto,bə həzrəti “İbn Xeyrəteyn” yəni dıqlə xeyri zoə həm votedəbin.İmom Səccod(ə) ıştə pı Kərbəlo vağeyədə şəhodəti bəpeştə   qıləy muhim iyən tale həlləkə rolış ifo kardeşe.ə həzrət 34 sor çın Vağeyə bədiqə bəyji mande və bın mıddəti dırozi de islomi umməti rəhbərəti bəştə ohdə peqətey,de mıxtəlifə formə de zılm iyən nodonəti məzhəron mıborizə bardedəbe.

Həzrəte Əli ibn Huseyn(ə) çandə qılə ləğəbonış heste ki,çəvon həmməysə məşhurə qılə Səccade.İmom Bağır(ə) hamyedə:”çımı pı Həzrəte Səccod ilahi har qıləy neməti bə yod dənoədə səjdə kardedəbe. Kərimə-Ğıroni har qıləy səjdə məsələ bıə ayə handeyədə səjdə kardedəbe. Har qıləy renc iyən əziyyət çəyku bərtərəf beyədə bəçəy xoto səjdə kardedəbe və har qıləy vocibə nımojiku farığ beyədə səjdə kardedəbe və ha vaxti mıvəffəğ bedə ki,dı nəfəri miyono ixtilofi islohko,bəştə bın koyədə tovfiği xoto, səjdə kardedəbe.çəy qırd səjdə vırəonədə səjdə əsəron oşko be,bəçəy xoto bəçımı pı Səccad votedəbin”.

İmom Səccod(ə)-i moəku bıeyku çandə ruj dəvardə nıbe ki,əy ıştə mehribonə moş çı dasto doe və çəy əzizə pı çəy tərbiyəş bəştə ohdə peqəte.İmom Səccod(ə) dı sor ıştə cədd Əmirəl-Muminin(ə)-i imoməti devronış dərk karde və həmçinin bəştə amu İmom Həsən(ə)-I bıə ziyodə eşği xoto çə həzrəti məhzərədə hozzı bedəbe və çı İmom Həsən(ə)-I əxloği iyən mənəvi feyzonku bəhrə bardedəbe.ə həzrət 12 sorə hırdən be ki,çəy əzizə pı imoməti devron bino be və hejo ıştə pıku dini təlimonku bəhrə bardeəbe tain ki,Hicri-Ğəməri 61-ə sori ıştən çı islomi umməti hidoyəti prəçəmış bəştə dastış qəte.

İmom Səccod(ə) həmməysə vey bəştə cəd Əmirəl-Muminin(ə)-i mandəbe və ibodətədə həm bənə ıştə cəddi ha şəv hafto qılə təkbir votedəbe iyən haşəv Kərimə-Ğıroni vey tilovət əkəy. çə həzrəti itam sufrə hejo oj bedəbe və fəğır-fuğəra,kəş nıbə kəson  iyən yətimon omeydəbin çə həmonə sufrəku bəhrə bardedəbin.İmom Səccod(ə) de ovi pur bıə məşkon bəştə duş ənəy  və bə yətim iyən miskinon kə əbardi. bə 300 qılə xıyzoni nez mıstəhəğğon ə həzrət de ov iyən nuni təmin əkardi.qıləy holədə ki,əvon zıneydə nıbin kom şəxs bəvon xorək doydə.həzrət boəvon xorək əbardi,rujon rujə əqəti və iftori vaxti de cəvi nuni iftor əkəy.çə həzrəti dıvo iyən zikron qıləy fəzilət iyən əxloği dərs be ki,əv qırd ıştə umri dırozi bə milləti omuteşe.Həzrəte İmom Sadığ(ə) çə həzrəti pərhizkorəti həxədə hamyedə:osmoni jiyədə bənə Əli ibn Huseyn(ə)-i qıləy inson oməni,əv iloğmə həromə xorəkış nıharde iyən bə həromi tərəf iqlə ğədəmış nıpeqəte.ğərəz həx co i kəlməş nıvote və sıvoy bo Xıdo xoto co iqlə əməlış əncom nıdoe.

Vəhyi mesaji bə insonon con iyən rufi rosney iyən oşkoə surətədə təblığ kardey çı har qıləy imom iyən ilahi rəhbəron vəzifəy.İmom Səccod(ə) həmonə məsuliyyətış bəştə ehdəş peqətebe ki,Əmirəl-Muminin(ə) əvış bəştə ehdə peqətəşbe. Həyğətədə,çı imomon missiya iyən vəzifəon əsl iyən rişə cəhəto deiyande i və mısoviye,əmmo  çəvon zəmoni şərayit iyən tələbon və milləti ehtiyocon har əsrədə farğ kardedə.