Təkfiri cərəyonon

Təkfiri cərəyonon

Bo vəhhabi sələfiyon zınero,harçisə bənav bəbe bə hədisi iyən rəvoyəti meylışon bıə cərəyon zıney bıbu. şək ni ki,Kərimə-Ğıroni bəpeştə sınnəti çı insonon hidoyəti koyədə əsosə rolış heste.əmmo sınnəti tarifədə nəzə mıxtəlife.çı muhəddison “sınnətiku” doə məlumatonədə bıə hədəf,Rəsulullah(s)- i sınnəti zıney iyən əy oşno kardey bıə.əvon cəhd kardedəbin ki,peyğombər(s) bo mısılmınon jıqo qıləy ulqu və nımonə nışon bıdən ta mısılmınon ıştə qırd jimon iyən mevğıyyətonədə və fərdi iyən iştimayi norma və prinsiponədə bəbe bə yolə şəxsiyyəti pemandon.bəçəy xoto çı sınnəti tarifədə votəşone:sınnət,har qıləy çi ki,bə peyğombəri(s) nisbət doey bıbu,ısət çı fel və hərəkət ya  ğovl(sıxan),təğrir və iğrar və ya çə həzrəti çı Besəti bənav və bəpeştə bıə əxloği iyən zohiri xısusiyyəton bıbu.bə həmonə dəlili xoto,çı peyğombər(s)  Besəti həmonə sıftədə çə həzrəti sıxan,rəftor iyən əməlon cəm kardedəbin və qırd mısəlmınon qıləy ulqu timsalədə ğərol doydəbin.islomi peyğombəri(s) rehləti bədiqə həm hədisi cəm kardey,bə islomi etığodi iyən usuli maarifi təbdil  be.çı şiyəon miyono hədisi elmi tarifədə omə ki,çı Məsum(ə)-i sıxan,əməl iyən iğroriku hikoyət kardə məlumati hədis votedən.yolə alimon qırd ıştə umrışon bo hədison cəm kardey iyən çəvon kom qıləyni metəbər iyən ğeyri-metəbər bıey zıneyro sərfışon kardə.bə ın dastə mısılmonə alimon omutə elmi “Hədisşınosi “votedən.votey bəbe ki,hədisi elm qıləy qıləy ğanunon zıneye ki,deçəy vositə çı hədisi sənəd iyən mətni holon zıney bedə.əmmo bın zəminədə çı şiyə de sınni miyono nəzəri cəhəto ixtilofon mevcude.sıftənə ixtilof çı peyğombəre-əkrəm(s)-i bəpeştə çı camiyə imomət iyən rəhbərəti məsələy.şiyə çın sıvolon cəvobədə ki,peyğombəri(s) rehləti bəpeştə kon şəxs bə milləti rəhbərəti ko loyığe?-bə bın zəminədə bıə ayə iyən rəvoyəton təkyə kardə holədə bə  Əhli-Beyt(ə)-i imomət iyən viloyəti və çəvon həmməy sədə bə Əli(ə)-i imoməti  bovəş heste. bə şiə əğedə əsos,bə camiyə harujnə ehtiyicon iyən milləti bə rəhbərəti və hidoyəti ehtiyocon əsos və həmçinin çəvon dini nığo doey iyən oqətey və çı inhirofon vəy qəteyro,fəğət Əli(ə) iyən çəy fərzəndon jıqo qıləy ləyoğətışon hestebe.çımi mığobilədə Əhli-Sınnəti həm  jıqo bovəşon hestemki,xilofət iyən rəhbərəti məsələ bə milləti icma dast aspardə bıə və bəbe əvon ıştən ıştə imomon bıvıjnon.çın dıqlə nəzə muşkilonku əlovə, praqmatik və praktiki ehanə peyğombər(s) hiçkəsış bə xəlifəti məğamış nəsb kardəş nıbu və xəlifə vıjniye bə insonon ıştən ehdəybu,çən çokonə iminə xəlifə bə ım sınnət iyən ğanuni əməlış karde və dıminə xəlifəş ıştə canişinış və bo milləti rəhbərış ğərol doe?aya ım əməl bə əhli-sınnəti ıştən nəzəriyyə əsos,çəvon iddio kardə de nəbəviyə  sınnəti mıxolif və əks ni? Xilofəti məsələ bəsə siyosi rəhbərətisə əlovə,co nəticəonıı həm bıə.çəy iminə nəticə elmi mərcəiyyət iyən ovard kardeye.bın mənoədə ki,peyğombər(s) huzur nıbə vaxti  kon kəs bə mısılmınon sıvolon cəvob doey bəzıne?qıləy tojə məsələ və hukm bə miyon omeyədə peyğombər(s) ıştən bımon dığğət əki və cəvob ədəy.həzrət qıləy məşhurə hədisədə ki,de “hədise səğəleyni” nomi məşhur be jıqo hamyeşe: ....mı dıqlə boho ğeymətinə çi şımə miyono ğərol doydəm.Xıdo kitob iyən ıştə itrəti (əhli-beyti). Im dıqlə hiçvaxti iyandeku co nibəbeyn tain ki,ğıyoməti ruji hovzi kəno çımı palu varid bəbeyn.