Osmoniyə surəon-88
Osmoniyə surəon-88
Anatomiya və Embriyoloji elmon nəzəku çı insoni ruşeymi inkişofi mıxtəlifə mərhələon ki,Kərimə-Ğıronədə tərsim iyən əks bıə,vey heyrətamize.alimon bın cəhəto bə heyrəti dıço bıən ki,Kərimə-Ğıron qıləy zəmonədə çı insoni doli ozavziye həxədə jıqo sıxanış votə ki,umumən bə zəmonədə jıqo qıləy elm mevcud nıbe.
Odəmi dığğəti cəlbəkə nuktə ıme ki,votedə astəmon de qujdi puşnemone.ayə de ın təbiri pusti əzələon bə olətiş təşbih kardə.çoko ki,libos iyən olət insoni bədəmi puşneydə,pusti əzəlon həm astəon sape edoydə.ehanə bəsə astəonsə bıə ın olət bıənəbe,insoni əndom vey yavə və noreçin əbi.(dırıst bənə skleti)co tərəfo həm çoko ki,libos insoni bədəmi çı sadr iyən qamiku oqəteydə,əsələon həm astəon muhafizə kardedən və əgər əvon bıənəbin,bə bədəmi varid bıə zərbə xoto.astəon de şiddəti xəsorət iyən ziyon əvindin. çı bədəmi əsliyə sutunonin bıə quşdon iyən muskulon astəon oqətey koyədə vey əsosə rol ifo kardedən.ımon çımiku hikoyət kardedə ki,Kərimə-Ğıroni təbiron vey barzə dığğətış heste.
Muminon mıborəkə surə 14-ə ayə oxonə hissəon bə oxonə mərhələ yəni həyğətədə bə bəşəri xılğəti vey muhimmə mərhələ işorə kardedə və hamyedə:” çən,peşo əvımon qıləy (tojə) co xılğəti surətədə xəlğ kardemone”. Bın etapədə embriyon bə insoniyə jimon iyən həyoti mərhələ daxil bedə,hiss iyən hərəkət pəydu kardedə və lıvedə ki,islomi rəvoyətonədə bə həmonə mərhələ rufi bə insoni bədəmi pu kardey təbir bıə.bın etapədə inson de qıləy dıjdə vaştemoni nəboti(beconəti) iyən beməyon jimoniku dəvardedə və bə insoni dınyo ğədəm noydə.iyo insoni qıləy məxsusə soxtemon və formə pəydu kardedə ki,əy çı aləmi qırd co məxluğatisə fərğin kardedə və bəy ləyoğəton əto kardedə ki,əv bə Xıdo zəminisə bıə xəlifə məğami rəsedə.peşo hamyedə:” çən,çı ofəyəkəson vey çokə qılə bıə Xıdo bə təkrim iyən təzimi loyığe”.
Afərin iyən əhsən bıbu bə ım mislış nıbə ğudrəti ki,qıləy toykiyə bətnədə bıə doliku jıqo nəfisə təsvirış bə rəsm kəşə və jıqo heyrətamiz və bə çoçinəti boyis bedə.Afərin bə hikməti soyb bıə Xıdo ki,qırd ım istedod, ləyoğət iyən məhorətış jıqo be erjə mevcudədə icodış kardə.
Muminon mıborəkə surədə həmçinin bənə Kərimə-Ğıroni coqlə surəon bə insonon pand iyən ibrəti boyis bıə çandə qılə navnə peyğombəron daston iyən sərquzəşton işorə kardedə.min cumlə çəvonku bə iminə “Ulul-Əzm” pəyğombər bıə Nuh(ə)-i ğıssə işorə kardedə.Nuh(ə)-i rujıqorədə zumandə insonon bəştə dasti jiyədə bıə zəyifə şəxson zılm kardedəbin,sosyal ədolət mevcud nıbe və millət mışrik iyən bıtpərəst bin.bın zəmon Xıdovəndi Nuh(ə)-ış de osmoniyə kitob iyən tohidiyə dini bəsə millətisə vığandeşe.Nuh(ə) bo milləti bə tohidi tərəf hidoyətiro ziyodə zəhmət iyən əziyyətış kəşe.əmmo çə həzrəti ğovmi məğrur iyən yoləşəxə əyon-əşrəfi bə camaati voteşone:ın merd həm bənə şımə qıləy bəşəre,əmmo əv piyedəşe ıştəni bəsə şıməsə bəpe bıqəto və dılış heste bəşmə təsəllut iyən hakimiyyət pəyduko.əvon voteşone ki, Nuh(ə) Xıdo,din iyən tohidi barədə votə çiyon qırd ımon vavunəy ki,əv dılış heste deçımon vositə bəşmə hokumətko.
Çəvon nəzəku çı Nuh(ə)-i ayb ımbe ki,əv firiştə və mələk nıbe və qıləy addiyə inson be.əvon voteşone: ehanə Xıdo dılış bıəbe qıləy rəsul əvğandi,jəqodə əv çı mələkonku ikəsiış bəbe vığandəşbe.əvon ıştə ın istidloli təkmilədə voteşone:əmə jıqo qıləy çimon ıştə əbo-əjdodonku məsəmon ni ki,qıləy inson boy peyğombərəti iddio bıko iyən ıştəni çı Xıdo nımoyəndə elonko.həlbəttə,çı mışrikon beəsosə iddion bə yolə pəyğombəri rufi hiç qıləy təsirış nınoe və Nuh(ə) hejo jəqo həm bəştə milləti bə vahidə Xıdo tərəf dəvəti koş dəvomış doe.peşo əvon bəy çı səfiyəti iyən beməxəti ittihomışon je və voteşone:ım qıləy merde ki.bə cındoəti noxəşəti mıbtəlo bıə.bəbe i mıddət çəşkəmon ta çəy mardey boy bırəso yaan ki,əv çın cındoəti noxəşətiku ıştə coni peroxno.
