Osmoniyə surəon-90

Osmoniyə surəon-90

Nuri mıborəkə surə Kərimə-Ğıroni visti çominə surəy ki,Hicrəti bəpeştə Mədinədə bə Xıdo peyğombər(s)-i nozil bıə və 64 qılə ayəku iborəte.bə ın surə bəçəy xoto Nur votey bıə ki,çın surə 35 ayədə Xıdovənde-Aləm de osmon iyən zəmini nuri nomi elon bıə.zinokorə merdı-jeni cəzoon hukmon,hicobi hukm və həmçinin çı jenı-merdon iffət iyən pokdovnəti həxədə mətləbon bın surədə bəhs bıə.çın surə mesajon ziyodə baxş,xıyzoni dırstə rabitəon iyən camiyə çı dırıst iyən nodırıstə iyən ğeyri-əxloği rabitəonku pok kardey barədəy.

Kəriə-Ğıroni prizmaku çı jenı-merdi miyono ğeyri-ğanuniyə rabitəon qıləy yavə,anormal iyən qıləy dıjdə qıno bə hisob omeydə.zira jıqo kontrol nıbə rabitəon bə xıyzonon bəyənde qıniye boyis bəbe.

Kərimə-Ğıron fəsod iyən nopokəti umumən bo mumini loyığ zıneydəni və bo qıləy zinokorə jenı-merdi qıləy şiddətinə ğanunış nəzədə qətə ki,çın surə dıminə ayədə çəyku bəhs bıə.bın ayədə təkid bıə ki,çı qınokor iyən cionoyətkoron cəzoədə bəbe emosiyə iyən hissiyaton bə nəzə sıey nıbu.ım boçəy xotoe ki,qınokoron ədəbin bıbon iyən iştimayi iffət hifz kardey bıbu.

Eyni holədə cinoyətin isbot iyən cəzoon icro,islomi hukmi ğanunon nəzəku qıləy saxtə şərayitış heste.min cumlə həddi icro kardeyədə ehanə bə imoninə jenon zino behton ğandey bıbu,boçəy ın qıno isbotiro bəbe ço nəfər şoyd vardey bıbu.çun,mumkine şər ğandey bo ğərəzinə fərdon qıləy bəhonə bıbu ta de ın vositə əvon pokdovnə şəxson ittihomkon.bilofosilə çı zinokoron şiddətinə cəzoon bəyoni bəpeştə,çı iftiro iyən şər ğandə kəson şiddətinə cəzo bəyon kardedə.4-ə ayədə hamyedə: “Və ismətin iyən şuş bıə jenon zino nisbəti doə kəson iyən ço qılə şoydış nıvardə kəson,çən (bəvon)həşto ğırmoc bıjənən iyən hiçfaxti çəvon şoydəti ğəbul məkənən.əvon həmonə fosiğonin”.

Nuri mıborəkə surə 11-ə ayəon bədiqə çandə qılə ayə bə “İfk” yəni dıjdə iftiro və du işorə kardedə ki,ım həm bə de iffəti  zidd bıə əməlon zəmonədə şəxsi beqınoəti mıttəhəm kardeye. tarıxədə omə ki, Bəni-Mustələğ ğəzvə oxo bəpeştə bə Mədinə oqardə royədə de peyğombər(s)-i bə ico bıə çə həzrəti jimoni həmro Ayişə,çı mısılmınon ğafilə iyən kərvoniku bə dumo mande. çoko ki,bə Mədinə oqardin,şayiəon pevolo bin iyən bəy şər-behtonon ğandey be.ım ittihomon  bə zıvonon eqıniye və həmmə vırəonədə pevolo be.peyğombər(s) çın ğəziyyə və məsələku vey norohət be.mınofiğon çın şayiə pevolo kardeyku  hədəf,camiyədə bə peyğombəri(s) ələyh qıləy bədqımonəti icod kardey və çın koyku bəştə mənfəəton əsos bəhrə bardey be.əmmo de nuri mıborəkə surə ayəon nozil bıey,çəvon həyğiyə çehrə ifşo be.

In ayəon  ki, çəy hukmon har qıləy muhit,əsr iyən zəmonədə cariye,muminon çı norəvoə behton iyən qımononku bərhəzər kardedə.Kərimə-Ğıron Nuri mıborəkə surə bın baxşədə çı hodisə əsliku bəhs kardedə və ın dıjdə behtoni bə miyon vardə kəson fıtnəkorə dastə zıneydə.ın ayəon bə yod dənoydə ki,şayiə pevolo kardey və zıvon eğandey və hiç qıləy elm iyən yəğın nıbə holədə ımi milləti miyono votey qıləy yolə qınoe və hətto ımi qədə zıney həm qıləy sanqinə qıno hisob kardedə.islomi camiyədə bəbe husni-zənn və çokə qımon hakim bıbu və mumin bəbe har qıləy sıxani rohət ğəbul nıko.zira fərdon iyəndesə məsuliyyətışon heste.ha holədə bo bənə zino ya pokdovnə jenon mıttəhəm kardey bıə qınon cəzo təyin kardey bo camiyə iyən xıyzonədə ğanunon hifz kardey iyən oqətey xotoe.