Osmoniyə sədo-6

Osmoniyə sədo-6

Mudiriyyət və idorəçiyəti elmədə əsosə məbhəsonku qıləyni”Vəomə vindey” ya “Vəomə həxədə təhğığe”. dınyoədə ixtisodi,fərhənqi,hərbi,əmniyyət iyən kəşfiyyati siyosəton veyni bə çımi əsos noey bıə.kali məmləkəton bo vist sori mıddəti  və bəzi qıləyni nimə əsr  və inkişof kardə kişvəron çandə qılə  iəsr ıştə proqramon iyən prespektivon tərsim iyən hozzı kardedən.islomi əslə fərhənqədə bə ın prinsipi ciddi dığğət kardey bıə,əmmo ım vəomə vindey zəmoni cəhəto qıləy məhdudiyyətış ni  və de “miadi” məfhumi bə əbədi iyən daymiyə dınyoro hozzı kardey bıə.

Islom ın təfəkkur iyən nəzə omuteydə ki,tı bo ın məhdudə dınyo xoto ofəyə bıəniş və bəbe çın dınyoku dəvardoş və ıştəni bo qıləy əbədi dınyoədə jimoniro hozzıkoş.qıləy zəmon əmə boştə kırtə mıddətış bıə bın dınyo  jimoni iyən boçəy vəomə qıləy proqram hozzı kardedəmon və bəy mınosib lozım bıə imkonaton hozzı kardedəmon,aya bo qıləy əbədiyə jimon  iyən həyoti bəbe hiç qıləy bərnomə iyən plan hozzı məkəmon? aya əmə kardey bəzınemon betafut bımandəmon və ıştə jimonədə bə vəomə hiç qıləy nəzəmon nıbu və boştə vəomə hiç qıləy bərnomə hozzı nıkəmon?.

Kərimə-ğıronçı həmmə kəsonku məxsusən muminonku bə təğva rioyət kardey tələb kardedə və çəvon jimoni bə oxo rəsey bənav,əvon bəbe boştə vəomə qıləy proqram hozzıkon,əsosə koon əncom bıdon iyən de bə təğva rioyət kardey və ilahi həd-hududon oqətey,ıştə vəomə həxədə qıləy fikkon və ıştəni bo əbədiyə dınyo jimoni hozzıkon.Xıdovənde-Aləm bın barədə Həşri mıborəkə surə 18-ə ayədə hamyedə: Ha imon vardə kəson ha!ilahi təğva roy bıqətən(və təhğığkənən ki)boştə maşkinə(ğıyoməti ruji) kon (salehə əməlon) vığandəyone?(Həşr-18.

Bə ın ayə əsos bə Xıdo bovəşon bıə muminon bəbe bə vahidə Xıdo imonisə əlovə,bəbe bə miad iyən insoni ğııyoməti ruji oqardey həm imonış bıbu.harçənd bə Xıdo imon iyən ilahi təğva roy qətey,insoni şəxsiyyəti soxtey koyədə təyinəkə rolış heste.əmmo  bə miadi imon vardey yəni qıləy ruj ki,çandə milyard insonon bəyji kardey bəbeyn ta ilahi ədolətinə məhkmədə bəştə dınyoədə kardə əməlon cəvob bədoyn və bo insoni viteyro hiç qıləy ro əmandıni.ehanə bıvotəmon ki,çımi çı insoni ıştəni soxteyədə ziyodə rolış heste.bın dınyoədə insoni ıştəni imonin iyən təğvanin nışon doey imkonış heste,əmmo axırəti dınyoədə çı insoni həyği mahiyyət iyən sırron peqətey bəbe.ğasbu ım bəçəy xotoye ki,çın ayə oxoyədə Kərimə-Ğıron hamyedə:”təğva roy bıqətən”(Xıdoku bıtarsənən) çun, beşək Xıdovənd bəçəvon kardə qırd koon aqahe.