Həzrəte Xədicə(ə)

Həzrəte Xədicə(ə)

Hicrəti daminə sori mıborəkə Rəməzonə manqi daminə ruji islomi əzizə peyğombəri mehribonə jimoni həmro ummul-muminin həzrəte Xədicəye-Kubra(s) vida ruje.ın ruj İslomi əzizə peyğombəri de həzrəte Xədicə(s) 25 sornə mıştərəkə jimoni oxonə ləzəon be.de həzrəte Xədicə(s) rehləti pəyğombər(s) ıştə jimoni həmro firağədə coyli mande. çı peyğombər(s) amu Əbu-Talıbi(ə) bəfotiku tikəy dəvardə nıbe ki, ın hodisə bə əməl ome.ın dıqlə əziz çı dasto doey,jıqo bə Xıdo-Rəsul(s)-I təsirış karde və əve həmonə sorış “ammul-huzn” yəni ğəmqinəti sor zıne.təsliyyət.

Həzrəte Xədicə(s) islomi həmməysə dıjdə banu və xanım bə hisob omeydəbe. çoko ki,Əli ibn Əbi Talıb(ə) çı merdonku iminə şəxs be ki,islomış ğəbul kardəbe, əv həm iminə jen be ki,dini-islomış ğəbul kardəbe. həzrəte Xədicə(s) iminə jen be ki,nımojış votəbe.əv çı kəmol,istedod,fame iyən bəsirəti barizə nımunə be ki,çı jenı-merdon miyono bənə ə həzrəti kamə şəxson bəçəş çiyedə.iffət,nəcobət,pokəti,səxavət,muaşirət hiss,səmimiyyət,mehr və bəfo çı həzrəte Xədicə(ə) barizə sıfətonku be.çoko ki,islomi əzizə pəyğombər(s) Kərimə-Ğıron nozil bıey iyən islomi bənav de əmonətdorəti məşhur be,Xədicə(ə) həm islomi bənav deştə təhorət iyən pokəti məşhur be.bəy çı Ğureyşi jenon tahirə iyən seyyidə votedəbin.bəçəy xoto “tahirə” çı” əmin”-i həmto be.

Həzrəte Xədicə(ə) 25 sor çı islomi sıftənə soronədə vey behroniyə zəmonədə çı pəyğombəri kənoədə be. Xədicə(ə) ki,bəştə moli ziyod bıey xoto,de “Mələkətul-Bətha” nomi məşhur be,ıştə qırd mol-əmvolış çə həzrəti ixtiyorədə ğərolış doe.bə islomi rəvoyəton əsos peyğombər(s) çı həzrəte Xədicə(s) molonku bo ğarzıxo soybon ozodətirovə bə yətimon iyən səfilon komək kardey xoto okoş doe.Xədicə(ə) baxşeşon jıqo dıjd iyən xolisonə be ki,Xıdovəndi əvış əziz qəte və çı həzrəte Xədicə(ə) ın koş bəştə vıjniyə bıə bandə həzrəte Muhəmməd(s)-I dıjdə nemətonku hisobış kardə və Zuha mıborəkə surə 7-ə ayədə hamyedə:…”Xıdovəndi tınış fəğır və kosibış vinde və be ehtiyocış karde”.yəni həzrəte Xədicə(ə) mol Xıdo mole və Xədicə(ə) ko ilahi dərqoyədə məğbul və ğəbule.

Həzrəte Xədicə(s) ıştə jimoni həmro çı Xıdo bo bəşəri hidoyətiro vığandə kəs zıneydəbe və bımi imonış hestebe.əv ıştə de həzrəte Muhəmməd(s)-I bıə mıştərəkə jimoni qırd devronədə ısət çı Besəti bənav bıbu ya bəpeşt,hejo cəhd kardedəbe bə ə həzrəti oroməti baxş kardeəbe və təsəlli doydəbe.həmonə bın zəmonədə ki,əziz-qramiyə peyğombər(s) bə ziyodə əzob-əziyyəton məruz mandedəbe,həzrəte Xədicə(ə) çə həzrəti ğəmo-ğussəonku bə kam kardedəbe və boyis bedəbe ki,ə həzrət həmonə dardon yodo beko. tarıxədə omə ki,iruji Məkkə mışrikon de tobə həzrəti Xədicə(ə) kə bə həzrəti sığ ğandeşone və əvışon yarəjə kardeşone.peşo əvon kəşon həm sığ baron kardeşone.bın zəmon həzrəte Xədicə(ə) bə bi beşe və voteşe:aya şımə həyo kardedəniyon ki,şımə miyono həmməysə nəcibə jeni kə sığ baron kardedon? mışrikon de ın sıxani məsey,xəcolətışon kəşe və volo-volo bin.bın zəmon Xədicə(ə) de həzrəte Peyğombəri(s) zəxmi iyən yarəon mudava və dəbastey ko məşğul be.bın vaxt be ki,peyğombəri(s) Xıdo tərəfiku bə Xədicə(ə)-i səlomış rosne və bəy əyo mehnət iyən saxti nıbə zumrudiku bıə vəhışti ğəsri mıjdəvoniş doe.