Osmoniyə sədo-8

Osmoniyə sədo-8

Çın sıvoliku bəhs bıənine ki,Kərimə-Ğıroni bə itoəti ğəbul kardey  iyən bə Xıdo iyən bəçəy peyğombəri dəvəti  cəvob doeyku hədəfış çiçe? Ğıron ıştən çımi barədə hamyedə: “Ha imon vardəkəsona! Xıdo iyən çəy rəsul şıməni bə qıləy jimon baxş kardə çi dəvət kardeyədə,əy ğəbulkənən və bızınən Xıdovənd çı inson iyən çəy dıli miyono hail(pardə) bedə iyən bəçəy tərəf məhşur bəbeyn”.Ənfal(24)

In ayə de ojə-oşkoə holəti votedə ki,Xıdo iyən çəy peyğombəri dəvət,bə jimon iyən həyoti tərəf dəvət kardeye. mənəvi,etığodi,fərhənqi,əxloği,iştimayi iyən siyosi  jimon və iqlə nəzədə qırd zəminəonədə bıə jimon iyən həyot. binobərin ehanə ikəs çəməku dəparso ki,çıro Xıdo iyən çəy peyğombər çəməku tələb kardedə ki,bəvon pemandəmon iyən itoətkəmon və çəvon dəvəti ğəbulkəmon.iqlə cumlədə  votey bəbe ki,çəvon hədəf bə bəşəri jimoni qırd cəhəton ilahi iyən insoniyə rufi pu kardeye.həmonə çi ki,ısətnə əsri cəmyəti de şiddəti bəy ehtiyociş heste.bəçımi əsos mıəyyən bedə ki,din iyən məzhəbi  bəşəri iştimayi jimoniku xaric iyən qıləy berufə silsilə bərnomədə zınə kəson  və çı jimoni bətniku xaricədə hisob kardə kəson çanədə səhfışon kardə.

Dini-Islomədə qırd ideloji,elmi,fərdi iyən sosyal zəminəonədə jimon iyən iftixor xəlğ kardedə,insoni ıştə iyən ıştə camiyədə mığobilədə məsuliyyət hiss kardey  bə əməl vardedə və bəy real qıləy jimon baxş kardedə.bə həmonə dəlili xotoye ki,kufri dınyo  ımruj çı Muhəmməd(s)-i vardə din iyən çəy həyğəton ziyod peviolo bıeyku norohətin və de çəvon mevğiyyət iyən mənfəəton de təhlukə dimbədim kardə çı islomi milləton tojə jimoni mıxolifin və jimon iyən həyot ofəyə islomi məhf kardey dumon.

Çın ayəku coqlə ımi dərk kardey bedə ki,insoni həyğiyə jimon çəy həmonə mənəvi iyən insoniyə jimone və ehanə inson iyən camiyə bımi mailk nıbu,əv byji nibəmande və bəmarde.qıləy mardə ki,bənə çolınqə heyvonon bəharde, pebəşome və hərəkət bəkarde,bəhıteyn.bəyşteyn,əmmo çəvon bın jimonədə çı əxloğöi iyən insoniyə həyotiku hiç qıləy əsər-əlomət mışohidə nibəbe.ğasbu  bə həmonə dəlili xoto,Yolə Xıdo bəştə pəyğombəri ki,çəy hədəf insonon bə mənəvi iyən insoniyə jimoni tərəf bardeye,həyoti əsəronışon  çı dasto doə və bənə hərəkət kardə mardə kəson barədə hamyedə:”bərosti tı (ıştə sıxani) bə bımyon quş rosney  nibəzıneş və(həmçinin) bə nıməskəson quşi.

De qıləy co bəyoni qıləy fərd iyən camiyə ki,çı qıno,həvəsbozəti iyən bə cokəson həxon təcavuzi batlağədə tasedəbu,bənə mardə kəsonin ki,çı məzlumon fəryod iyən nolə məsedənin.Kərimə-Ğıron çımon xısusiyyəton jıqo tərsim kardedə:” Və həyğətən,çı cın iyən insi veyni bo cəhəndımi ofəyəmone (oxnə vırəşon əvrəy,çıro ki,)çəvon dılışon heste,əmmo,deəy həxı dərk kardey zıneydənin iyən çəşışon heste de əy vindeydənin və quşışon heste deəy məseydənin.əvon bənə ço lınqə heyvonin, bəlkəm, çəvonsə vey zəlolətədən.əvon həmonə ğafilonin”.

Dığğət kardey lozıme ki,Yolə Xıdo mənəvi iyən insoniyə jimoni soyb nıbə kəson sıftədə bə ağl iyən şuuri nemətiku məhrum bıə  və hiç qıləy zıney əbzoroışon nıəbə ço lınqə heyvonon təşbih kardedə və peşo hamyedə ki,ımon deməkə ki,ağl,çəş iyən quşışon heste,əmmo bənə hiç qıləy hiss iyən dərkışon nıbə bımyon  jimon kardedən.və hətto ımon çı çolınqə heyvononsə həm saru və exrocin.Kərimə-Ğıron jıqo fərdon bə qurıstonədə dəfn bıə bımyon təşbih kardedə.bə həmonə dəlili xoto Yolə Xıdo bəştə buzurquvarə rəsuli hamyedə:”(Həxı cəbhədə)jimon kardə kəson de(botıli cəbhə)bımyon mısovi nin. həyğətən,Xıdo bə hakəsi ki,(ğabiliyyət iyən ləyoğətış) bıbu  və bıpyoşe,bəməsovne və tı (ıştə sıxani) bə quronədə(hıtəkəson) rosney nibəzıneş.(Ftir-22).