Osmoniyə sədo-10

Osmoniyə sədo-10

Çoko ki,dəvardə proqramədə ərz kardemone ki,çı imon vardə kəson muhimmə məsuliyyətonku qıləyni  bə Xıdo iyən bəçəy peyğombəri itoət kardey ruhiyyə ğəbul kardeye.ım ruhi hozzı bıey,ıştən boştə  icod bedəni və bə qıləy zəminə hozzı kardey ehtiyociş heste.qıləy mevzu ki,bın zəminədə kilidə rolış heste,bə Xıdovəndi mığəddəsə zoti ”ubudiyyət iyən bandəçəti” prinsipi rioyət kardeye.Xıdovənde-Aləm Həcci mıborəkə surə 77-ə ayədə jıqo hamyedə:

“Ha imon vardə kəson ha! rukukənən iyən bə səjdə bışənən və ıştə pərvərdıqori ibodətkənən iyən çokə ko əncomdənən ki, (ğasbu)nicot pəydukoyn”.

Ubudiyyət yəni məhzə formədə bə Xıdo əmron pemandey iyən fəğət bəy tabe bıeye.çın pərəstışi vey muhimmə nışonəonku qıləyni rukuye.yəni insoni ıştə Xalıği mığobilədə şat bıey,təzim kardey iyən bəy səjdə kardeye.ikəs ki.bandəçəti hissış bıbu,həni əv Xıdovəndi mığobilədə usyon nibəkarde və əv bəştə rəbbi sə təzim bəkarde.əv hiçvaxti məğrur nibəbe  iyən yoləşəxəti nibəkarde.bəlkəm əv deştə qırd ubudiyyəti ıştə çəkuti bəsə zəminisə noydə .ehanə jıqo qıləy ruhiyyə qıləy bandədə icod nıbu və əv ilahi əzəməti mığobilədə səjdə nıkon,mələkuti iyən Xıdovəndi ozod baxş kardə  fəzoədə iştirok kardey nibəzıne.bə həmonə dəlili xoto,ın ayə sıftədə çı ruku iyən səjdəku sıxan votedə və peşo pərvərdıqori bandəçəti fərmoni sadir kardedə.

Kərimə-Ğıron bə Xıdo imon vardə kəson şıə roy xətti işorə kardedə və Fəthi mıborəkə surə 29-ə ayədə hamyedə:”Əvoni hejo ruku iyən səjdə holədə bəvindeş və əvon hejo ilahi dərqoyədə fəzl,baxşeş iyən çəy rizoyəti tələb kardedən  və çəvon simadə sıjdə nışonə(mışohidə bedə)”.

Həlbəttə,Kərimə-Ğıroni  mənzur iyən məğsəd  ım ni ki,bə pəyğombəri imon vardə kəson cəmyətiku təcrid bıbon iyən qıləy kıncədə bımandon və de nımoji  iyən ruku-səjdə məşğul bıbon və təhlukəninə məsuliyyəton ğəbul nıkon.Ğıroni məğsəd ıme ki,əvon bəpe ıştə jimoni qırd etat-petatonədə Xıdo-Rəsuli (s) boştə ulqu bıqəton və iftixoramizə bandəçəti taci bəştə sə bınon və fəğət bə ilahi rizvan məğami iyən Xıdo rizoyəti bədast vardey fikədən.odəmi dığğəti cəlbəkə çi ıme ki,Kərimə-Ğıron  həmonə bın ayədə hamyedə:həmonə sucud iyən səjdə nışonəon çəvon simadə mışohidə kardey bedə.yəni çəvon qırd əməl və hərəkəton ımi bəyon kardedə ki,de bə peyğombəri(s) pemandey,bə Xıdo bandəçəti əmri tabe bıeye...

Hestemoni aləmi məbdə iyən Xalıği mığobilədə bandəçəti hiss kardə kəson,hiç qıləy sıvol nıkardə holədə bə Xıdo iyən bəçəy Rəsuli əmron pemandedən.

Xıdo iyən çəy Rəsul qıləy ko hukm kardeyədə, hiç qıləy merd iyən jeni həxış ni ıştə tərəfiku co qıləy ko bıvıjno və hakəs bə Xıdo iyən bəçəy Rəsuli nıpemando, çən, beşək bə qıləy oşkoə zəloləti dıço bıə.Əhzab-36